ހޮޓަލެއްގެ ގެސްޓު ރޫމެއްގެ ތެރެއިން އިންޑިއާގެ ސައުތު ސިނަމާގެ މަލަޔާލަމް އެކްޓަރަކު މަރުވެފައި އޮއްވާ ފެނިފައިވާ ކަމަށް މީޑިއާތަކުން ރިޕޯޓު ކޮށްފިއެވެ.

އިއްޔެގެ ވަގުތެއްގައި ކެރެލާގެ ހޮޓަލަކުން މަރުވެފައި އޮތްވާ ފެނިފައިވަނީ މަލަޔާލަމް އެކްޓަރު ދިލީޕު ސަންކަރު އެވެ. އިންޑިއަން އެކްސްޕްރެސްގައިވާ ރިޕޯޓެއްގައި ބުނެފައިވަނީ މި މައްސަލަ މިހާރު ފުލުހުން ތަހުގީގު ކުރަމުންދާ ކަމަށެވެ.

ރިޕޯޓުތައް ބުނާ ގޮތުގައި އޭނާ އެ ހޮޓަލަށް ޗެކްއިން ވެފައިވަނީ މީގެ ހަތަރު ދުވަސް ކުރިންނެވެ. އަދި އޭނާ އެ ހޮޓަލުގެ ކޮޓަރިން ބޭރަށް ނުދާތާ ދެ ދުވަސްވެފައިވާ ކަމަށް ހޮޓަލުގެ ސްޓާފުން ބުނެފައިވާ ކަމަށްވެސް ރިޕޯޓުގައި ވެއެވެ.

އަދި އެ ކޮޓަރި ކައިރީގައި ވަރަަށް ނުބައި ވަސްގަނޑެއް ހުރުމުން އެކަމުގެ ސަބަބުން ހޮޓަލުގެ ސްޓާފުން އެ ކޮޓަރި ހުޅުވި ކަމަށާއި، ހުޅުވިއިރު އޭނާ އޮޮތީ މަރުވެފައި ކަމަށް ރިޕޯޓުގައި ވެއެވެ. އަދި ވަގުތުން ފުލުހުންނަށް މައްސަލަ ހުށަހަލާފައިވާ ކަމަށާއި، ފުލުހުންގެ ފޮރެންސިކު ޓީމެއް އެތަނުގައި ހަރަކާތްތެރި ވެފައިވާ ކަމަށްވެސް ރިޕޯޓުގައި ވެއެވެ.

ފުލުހުން ބުނީ މިހާރު އެ މަރުގެ ހަގީގަތް ދެނެގަތުމަށްޓަކައި އޭނާގެ ހަށިގަނޑު ޕޯސްޓްމޯޓަމް އަށް ފޮނުވާފައިވާ ކަމަށެވެ.

ދިލީޕު އެންމެ ފަހުން ސޯޝަލް މީޑިއާގައި ޕޯސްޓެއް ހިއްސާ ކޮށްފައިވަނީ މީގެ 7 ދުވަސް ކުރިންނެވެ. އޭނާ އެންމެ ފަހުން ޕޯސްޓު ކޮށްފައިވާ ފޮޓޯ އަކީ އޭނާގެ ކުރިއަށް އޮތް ފިލްމު "ޕްރަވިންކޫދު ޝައްޕޫ" ޕްރޮމޯޓު ކުރުމަށް ކޮށްފައިވާ ޕޯސްޓެއް ކަމަށް ރިޕޯޓުތައް ބުނެއެވެ. މި ފިލްމު ނެރުމަށް ހަމަޖެހިފައިވަނީ 2025 ގެ ޖެނުއަރީ 16 ގައެވެ.