ބޮލީވުޑުން ބޭނުންވަނީ ހުސް ބްލޮކްބަސްޓަރ ފިލްމު އުފައްދަން ކަމަށް ފިލްމު އުފެއްދުންތެރިޔާ އަނުރާގް ކަޝްޔަޕް ބުނެފިއެވެ.

އޭނާ މިހެން ބުނެފައިވަނީ ދާދި ފަހުން 'ދަ ހޮލީވުޑް ރިޕޯޓަރ' އަށް ދިން އިންޓަވިއުއެއްގައި ފިލްމު އިންޑަސްޓްރީގައި ކަންހިނގާ ގޮތުގެ ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ ބޮލީވުޑުން ބޭނުންވަނީ ހުސް ބްލޮކްބަސްޓަރ ފިލްމުތައް ނެރެން ކަމަށާއި، ބޮލީވުޑުން ބޭނުންވަނީ އިންޑިއާގެ ސިނަމާގައި ގަދަ ވެގަންނަން ކަމަށެވެ.

އަދި މިކަމުގެ ސަބަބުން އެކްޓަރުންނާއި ފިލްމު އުފެއްދުންތެރިން އެމީހުންގެ އަމިއްލަ ނަފްސަށް ކުރާ އިތުބާރު ގެއްލޭ ކަމަށްވެސް އޭނާ ވަނީ ފާހަގަކޮށްފައެވެ.

މީގެ އިތުރުން ކާމިޔާބީ ބޭނުންވާތީ މިހާރު ގިނަ ފިލްމު އުފެއްދުންތެރިން ބޭނުންވަނީ ކުރީގެ ފިލްމުތަކުގެ ސީކުއެލްތައް އުފައްދަން ކަމަށާއި، އާ ޚިޔާލުތައް ބޭނުން ކުރަން ބޭނުން ނުވާ ކަމަށްވެސް އޭނާ ވަނީ ބުނެފައެވެ.

އޭނާ ވަނީ މިކަމާ ބެހޭ ގޮތުން ވާހަކަ ދައްކަމުން މަލިޔާޅަމް ސިނަމާގައި ކަންތައް ކުރާ ގޮތަށް ތައުރީފު ކުރިއެވެ. އެގޮތުން އޭނާ ބުނެފައިވަނީ މަލިޔާޅަމް ސިނަމާގައި އާ ޚިޔާލުތަކަށް ފުރުސަތު އޮންނަ ކަމަށާއި ކޮލަބޮރޭޓް ކުރުމުގެވެސް ފުރުސަތު އޮންނަ ކަމަށެވެ. އަދި މިއީ ބޮލީވުޑަށްވެސް ބޭނުންތެރި ކަމެއް ކަމަށް އޭނާ ވަނީ ފާހަގަ ކޮށްފައެވެ.