އާންމުންގެ ފަރާތުން ބޮޑު ތަރުހީބެއް ލިބިފައިވާ "ގޯލްޑަން ފުޓްސަލް ޗެލެންޖް 2025" މިރޭ ފަށަން ތައްޔާރުވެއްޖެއެވެ.

މި މުބާރާތް މިރޭ ފަށަނީ ޗެރިޓީ ޝީލްޑް މެޗަކުންނެވެ. އެގޮތުން މިރޭގެ މެޗުގައި ބައްދަލު ކުރާނީ މިދިޔަ އަހަރުގެ ޗެމްޕިއަން ބ. އޭދަފުއްޓާއި، 2023 ގެ ޗެމްޕިއަން ލ. ގަމެވެ.

މި މެޗް ބޭއްވުމަށް ހަމަޖެހިފައި ވަނީ މިރޭ ހުޅުމާލޭ ރެހެންދި ފުޓްސަލް ދަނޑުގައި 8:30 ގަ އެވެ. މިއީ ގޯލްޑަން ފުޓްސަލް ޗެލެންޖުން ޝީލްޑް މެޗު ބާއްވާ ތިންވަނަ ފަހަރެވެ.

މިދިޔަ އަހަރުގެ މުބާރާތް ފެށުމަށް ކުޅުނު ޝީލްޑް މެޗުގައި ތ. ތިމަރަފުއްޓާ ވާދަކޮށް ގަމުން ވަނީ 3-2 ގެ ނަތީޖާއަކުން މެޗު ކާމިޔާބުކޮށް، އަދި އެ ޓީމުން ވަނީ ޝީލްޑް އުފުލާލާފަ އެވެ.

މި އަހަރުގެ ޗެރިޓީ ޝީލްޑް މެޗުގައި އޭދަފުއްޓާއި ގަން ބައްދަލުކުރާ އިރު، މިދިޔަ އަހަރުގެ މުބާރާތުގެ ފައިނަލުގައި ވެސް ވާދަކޮށްފައި ވަނީ އެ ދެ ޓީމެވެ.

ޗެރިޓީ ޝީލްޑް މެޗަށް ފަހު "ގޯލްޑެން ފުޓްސަލް ޗެލެންޖް" ގެ މެޗުތައް ރަސްމީކޮށް ފަށާނީ މާދަމާ ރޭގައެވެ. މި މުބާރާތުގައި 128 ޓީމު ވާދަކުރާގޮތަށް ވަނީ ހަމަޖެހިފައެވެ.

ގޯލްޑަން ފުޓްސަލް އެސޯސިއޭޝަނުން އެންމެ ފުރަތަމަ މި މުބާރާތް ބޭއްވީ 2015 ގަ އެވެ.