ފަޅޮލަކީ އަޅުގަނޑުމެންގެ ތެރޭގައި ގިނަ ބަޔަކަށް ކަމުދާ މޭވާއެކެވެ. މިއީ ތަފާގު އެކިކަހަލަ ނިއުޓްރިއެންޓުތައް ހިމެނޭ އެއްޗަކަށް ވީއިރު މި ކެއުމުން ސިއްހަތަށް ވަރަށް ގިނަގުނަ ފައިދާތައް ލިބެއެވެ. ތިރީގައި މި ހިމަނާލަނީ ކޮންމެ ދުވަހަކު ހެނދުނު ހޭލައިގެން ފަޅޯ ކެއުމުން ސިއްހަތަށް ލިބޭ ބައެއް ފައިދާތަކެވެ.

ހަޖަމުގެ މައްސަލަތައް ހައްލު ކޮށްދޭ

ފަޅޮލަކީ އޭގައި ޕަޕައިން ނަމަކަށް ކިޔާ މާއްދާއެއް އެކުލެވޭ އެއްޗެކެވެ. ޕަޕައިން އަކީ ހަޖަމުގެ މަސައްކަތްތައް އަވަސް ކޮށްދިނުމުގައި އެހީވެދޭ ޕްރޮޓީން އެކެވެ. އެހެންކަމުން މި ކެއުމުން ކާއެއްޗެހި ފަސޭހަކަމާއެކު ހަޖަމުވެއެވެ. އަދި މިއީ ގިނަ އަދަދަކަށް ފެނާއި، ފައިބާ އެކުލެވޭ އެއްޗެއް ކަމުން މި ކެއުމުން ބަނޑު ހަރުވުން ހުއްޓުވައިދީ ހަޖަމުގެ މައްސަލަތަކުންވެސް މީހާ ދުރުކޮށްދެއެވެ.

ދިފާއީ ނިޒާމު ވަރުގަދަވޭ

ފަޅޮލަކީ ގިނަ އަދަދަކަށް ވިޓަމިން ސީ އެކުލެވޭ އެއްޗެއް ކަމުން މި ކެއުމުން މީހާގެ ދިފާއީ ނިޒާމު ވަރުގަދަވެ، ބަލިތަކާ ދެކޮޅަށް މަސައްކަތް ކުރާ ވަރު ރަނގަޅު ވެއެވެ. އަދި އޭގެ ސަބަބުން ތަފާތު އެކިކަހަލަ އިންފެކްޝަންތަކާއި ބަލިތަކުން މީހާ ރައްކާތެރި ވެއެވެ.

ހަންގަނޑު ރީތިވޭ

ފަޅޮލަކީ އޭގައި ގިނަ އަދަދަކަށް އެންޓި-އޮކްސިޑެންޓުތައް ހިމެނޭ އެއްޗެއް ކަމުން މި ބޭނުން ކުރުމުން ފްރީ ރެޑިކަލް ތަކާ ދެކޮޅަށް މަސައްކަތްކޮށް، ހަށިގަނޑު އޮކްސިޑޭޓިވް ސްޓްރެސް އާ ދުރުކޮށްދެއެވެ. އަދި އޭގެ ސަބަބުން ހަންގަނޑުގައި ހުންނަ ލަތްތައް ފިލައި ހަންގަނޑުގައި ބިހި ނެގުން ހުއްޓި މީހާގެ ހަންގަނޑު ރީތިވެއެވެ.

މަސްދަރު: ޓައިމްސްެއޮފްއިން