އަމިއްލަފުޅަށް އިސްތިއުފާ ދެއްވުމަށްފަހު ފިއްލަވައިގެން އިންޑިއާއަށް ވަޑައިގެން އުޅުއްވާ ބަންގާލްދޭޝްގެ ކުރީގެ ބޮޑުވަޒީރު ޝައިހް ހަސީނާ ހައްޔަރުކުރުމަށް ބަންގްލާދޭޝްގެ ކޯޓަކުން އަނެއްކާވެސް އަމުރެއް ނެރެފި އެވެ.

މިދިޔަ އަހަރުގެ އޮގަސްޓް މަހުގެ ތެރޭގައި އެގައުމުގެ ދަރިވަރުން ގެނައި އިންގިލާބަކުން ހަސީނާގެ ވެރިކަން ވައްޓާލުމާއެކު އުމުރުން 77 އަހަރުގެ ހަސީނާ ވަނީ އިންޑިއާއަށް ވަޑައިގެން އެގައުމުން ހިމާޔަތް ހޯއްދަވާފައެވެ. ހަސީނާގެ މައްޗަށް އިންސާނިއްޔަތާ ޚިލާފު ޖަރީމާތަކެއް ހިންގި ކަމުގެ ތުހުމަތުގައި މީގެ ކުރިން ވެސް ވަނީ ހައްޔަރުކުރުމުގެ އަމުރެއް ނެރެފަ އެވެ.

ބަންގްލަދޭޝްގައި 15 އަހަރުވަންދެން ހަސީނާ ވެރިކަންކުރައްވާފައިވާއިރު އޭނާގެ ވެރިކަމުގައި އިންސާނީ ހައްގުތަކަށް އަރައިގަތުމުގެ އެތަކެއް ސީރިއަސް އަމަލުތައް ހިންގާފައިވާކަމަށް ތުހުމަތުކުރެއެވެ. އޭގެ ތެރޭގައި ސިޔާސީ ވާދަވެރިން ގިނަ ބަޔަކު ބަންދުކުރުމާއި، ގާނޫނީ ހަމަތަކުން ބޭރުން މީހުން މެރުން ހިމެނެ އެވެ.

ޑޮމެސްޓިކް އިންޓަނޭޝަނަލް ކްރައިމްސް ޓްރައިބިއުނަލް (އައިސީޓީ)ގެ ޗީފް ޕްރޮސެކިއުޓާ ތާޖުލް އިސްލާމް ވިދާޅުވީ ހަސީނާ ހައްޔަރު ކުރުމަށް ދެވަނަ އަމުރު ނެރުނީ ހަސީނާގެ ވެރިކަމުގައި ގެއްލުވާލާފައިވާ މީހުންގެ މައްސަލައިގައި ކަމަށެވެ.

ހަސީނާގެ ވެރިކަމުގައި ބަންގްލަދޭޝްގެ ސަލާމަތީ ބާރުތަކުން 500 އަށް ވުރެ ގިނަ މީހުން ވަގަށް ނެގި ކަމަށް ތުހުމަތު ކުރެވޭއިރު، ބައެއް މީހުން އެތައް އަހަރެއް ވަންދެން ސިއްރު ފެސިލިޓީތަކުގައި ބަންދުކޮށްގެން ގެންގުޅެފައިވާކަމަށްވެސް ވަނީ ތުހުމަތުކޮށްފަ އެވެ.