އެމެރިކާގެ އެހީތެރިކަމާއެކު ނިރުބަވެރި އިސްރާއީލުން ޣައްޒާގައި ހިންގަމުންދާ ޖަރީމާތަކުގެ ތެރެއިން ކުށެއްނެތް 28 މީހުން ޝަހީދުކޮށްލައިފިއެވެ.

އިސްރާއީލުން ޣައްޒާގެ އެކި ހިސާބުތަކުގައި ބޮން ގޮއްވާލުން ކުރިއަށްގެންދާއިރު، މީހުން ދިރިއުޅޭ އިމާރާތްތަކަކަށް އިއްޔެ ދިން ހަމަލާތަކެއްގައި ހަ މީހަކު ވަނީ ޝަހީދުކޮށްލާފައެވެ. މި ހަމަލާގައި ޝަހީދުވި މީހުންގެ ތެރޭގައި ކުޑަކުއްޖަކު ހިމެނޭއިރު އެހެން ހިސާބުތަކަށް ދިން ހަމަލާތަކާއެކު އިއްޔެ އެކަނިވެސް އިސްރާއީލުން ވަނީ 28 މީހުން ޝަހީދުކޮށްލާފައެވެ.

އދ.ގެ ރިލީފް ޗީފް ޓޮމް ފްލެޗާ ވިދާޅުވާ ގޮތުގައި ޣައްޒާގައި މީހުން ސަލާމަތްކުރުމަށް ހަރަކާތްތެރިވާ ފަރާތްތަކަށް މިހާރު އެއްވެސް ވަރަކަށް ރައްކާތެރިކަމެއް ނެތެވެ. އެގޮތުން ޣައްޒާގެ ރައްޔިތުންގެ ފުރާނަ ސަލާމަތް ކުރުމަށް ކުރާ މަސައްކަތްތައް މިހާރު "ބްރޭކިން ޕޮއިންޓްގައި" ވާކަމަށާއި އިސްރާއީލުން އެހީދޭ މީހުންނަށް ދޭ ހަމަލާތައް ހުއްޓުމެއްނެތި ކުރިއަށް ގެންދާކަކަށާއި ހަނގުރާމަވެރި ސަރަހައްދުގައި ގާނޫނާއި ގަވާއިދު ފުނޑުފުނޑުވަމުންދާކަމަށް އޭނާ ވަނީ ތުހުމަތު ކޮށްފަ އެވެ.

ނިރުބަވެރި އިސްރާއީލުގެ ހަމްލާތައް އަނެއްކާވެސް އިތުރުވާން ފަށާފައި މިވަނީ އެގައުމަށް ވާގިވެރިވާ އެމެރިކާއިން އަސްކަރީ ހަތިޔާރުގެ އާ ޝިޕްމެންޓެއް ދޭނެކަން އިއުލާންކުރިތާ މާގިނަ ދުވަސްތަކެއް ނުވެއެވެ.

ޣައްޒާގައި އިސްރާއީލުން ހިނގި ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން މަދުވެގެން 45،854 ފަލަސްތީނު މީހުން މަރުވެ 109،139 މީހުން ވަނީ ޒަޚަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަދުވެގެން 1،139 މީހުން މަރުވެ، 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.