މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ، އެމްޓީސީސީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ، އެމްޓީސީސީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީގެ މަޝްރޫއުތަކުގެ އަދާހަމަ ބަލައިލުމަށް ޕްރޮޖެކްޓް ޑޭޝްބޯޑު ތަޢާރަފް ކޮށްފިއެވެ.

އެމްޓީސީސީން މިއަދު ބުނީ އެކުންފުނިން ރާއްޖޭގެ އެކިކަންކޮޅުތަކުގައި ހިންގަމުންދާ މަޝްރޫޢުތަކުގެ އަދާހަމަ ތަފްސީލު ޢާއްމުކޮށް ފެންނާނެ "ޕްރޮޖެކްޓް ޑޭޝްބޯޑް" އިއްޔެ ތަޢާރަފު ކޮށްފައިވާ ކަމަށެވެ.

އަދި މި ޑޭޝްބޯޑަކީ އެމްޓީސީސީގެ މެނޭޖިންގ ޑިރެކްޓަރ، ރިޓަޔަރޑް ޑީ.ސީ.ޕީ އަޙްމަދު ސަޢުދީގެ އިސްނެންގެވުމާއި އިރުޝާދުގެ މަތިން އުފައްދާ ބިނާކޮށްފައިވާ އޮންލައިން ނިޒާމެއް ކަމަށް އެމްޓީސީސީން ހާމަކޮށްފައިވެއެވެ.

“މިފަދަ ޑޭޝްބޯޑެއް ބިނާކުރުމުގެ މައިގަނޑު މަޤްޞަދަކީ ދިވެހި ރައްޔިތުންނަށް ދެފުއް ފެންނަ ގޮތަށް ފަސޭހައިން އެމްޓީސީސީއިން ހިންގާ މަޝްރޫޢުތަކު އެންމެ ފަހުގެ މަޢުލޫމާތު ބެލޭނެ ފުރުސަތު ތަނަވަސް ކޮށްދިނުމެވެ.” އެމްޓީސީސީން މަޢުލޫމާތު ދީފައިވެއެވެ.

ހަމައެއާއެކު އެމްޓީސީސީން ބުނީ، މިހާރު ކޮންމެ ވަގުތެއްގައި، ކޮންމެ ތަނެއްގައި ހުރެގެންވެސް އެމްޓީސީސީގެ މަޝްރޫޢުތަކާ ބެހޭ މަޢުލޫމާތު ރައްޔިތުންނަށް މިޕްރޮޖެކްޓް ޑޭޝްބޯޑް މެދުވެރިކޮށް ފޯނުންވެސް ބަލައިލެވޭނެ ކަމަށެވެ.

މި ޑޭޝްބޯޑު ފަރުމާކޮށް ތައްޔާރު ކޮށްފައިވަނީ އެމްޓީސީސީގެ އެތެރޭގެ ޓީމަކުން ކަމަށާއި މި ޑޭޝްބޯޑުން، މަޝްރޫޢުތަކުގެ ބާވަތާއި، ކުރެވޭނެ މަސައްކަތްތަކާއި، އަގާއި، ނިމިފައިވާ އިންސައްތަ އާއި އެންމެ ފަހުގެ ސްޓޭޓަސް އެނގެން ހުންނާނެ އެމްޓީސީސީން ވަނީ ބުނެފައެވެ.

އޭގެ އިތުރުން މިޑޭޝްބޯޑުން ފޯރުކޮށްދޭ މަޢުލޫމާތަކީ ވަގުތުން އަދާހަމަކުރެވިފައިވާ އެންމެ ފަހުގެ މަޢުލޫމާތު ކަމަށާއި އެކުންފުނީގެ އަމާޒަކީ، ރާއްޖޭގެ އެކި ކަންކޮޅުތަކުގައި ހިންގާ އެކިއެކި މަޝްރޫޢުތަކާއި ބެހޭ އެންމެ ފަހުގެ ތަފްސީލީ މަޢުލޫމާތު ރައްޔިތުންނަށް ދެފުށް ފެންނާނެހެން، ލުއިފަސޭހަކަމާއެކު އަބަދުވެސް ބެލޭނެ އިންތިޒާމް ހަމަޖެހިފައިވާކަން ކަށަވަރު ކުރުންކަން އެމްޓީސީސީގެ ބަޔާނުގައި ފާހަގަ ކޮށްފައިވެއެވެ.



ކިޔުންތެރިންގެ ހިޔާލު



ޓްރެންޑިން