މިހިނގާ ޖެނުއަރީ މަހުގެ 19 ވަނަ ދުވަހާއި ހަމައަށް އެމެރިކާގައި ޓިކްޓޮކް ބޭނުންކުރާ 170 މިލިއަނަށް ވުރެ ގިނަ މީހުންނަށް ޓިކްޓޮކް ބޭނުން ނުކުރެވޭ ގޮތަށް ހަދާފައިވާ ގާނޫނަށް ތާއީދުކޮށް، އެ ޕްލެޓްފޯމް މަނާކުރަން އެމެރިކާގެ ސުޕްރީމް ކޯޓުން ހުކުމްކޮށްފިއެވެ.

އެމެރިކާގެ ސްޕްރީމް ކޯޓުން ކުރި ހުކުމްގައި ބުނެފައިވަނީ އެ އެޕްލިކޭޝަން ހިންގާ ޗައިނާގެ ކުންފުންޏަކާ މެދު އެމެރިކާ ސަރުކާރުން ގައުމީ ސަލާމަތާ ބެހޭ ސައްހަ ކަންބޮޑުވުންތައް ހާމަކޮށްފައިވާ ކަމަށެވެ. އެހެން ނަމަވެސް އެ ގާނޫނުގެ ސަބަބުން ހިޔާލު ފާޅުކުރުމުގެ މިނިވަންކަމުގެ ހައްގަށް އުނިކަމެއް ނާންނާނެ ކަމަށް ސްޕްރީމް ކޯޓުން ވަނީ ކަނޑައަޅާފައެވެ.

އެމެރިކާގެ ރައީސް ޖޯ ބައިޑަން ޓިކްޓޮކް މަނާކުރުމަށް ނުވަތަ އެމެރިކާގެ ކުންފުންޏަކަށް ވިއްކާލުމަށް ތަސްދީގު ކުރެއްވި ބިލްގެ ދަށުން ޓިކްޓޮކްގެ މައި ކުންފުނި، ބައިޓްޑާންސްއަށް ވަނީ ޓިކްޓޮކް އެމެރިކާ ކުންފުންޏަކަށް ވިއްކާލުމަށް ނުވަތަ އެމެރިކާގައި ބޭނުންކުރުން ހުއްޓާލުމަށް 12 މަސްދުވަހުގެ މުއްދަތެއް ދޭން ނިންމާފައެވެ.

މިދިޔަ އަހަރު އޭޕްރީލް މަހު ރައީސް ބައިޑަން ތަސްދީގުކުރެއްވި އެ ބިލުގައި ބުނެފައިވަނީ ޓިކްޓޮކްގެ ވެރި ކުންފުނި، ބައިޓްޑާންސުން ހަ މަސް ތެރޭގައި އެ އެޕް ދޫކޮށްނުލައިފި ނަމަ އެމެރިކާގެ އެޕްސްޓޯތަކުން ޓިކްޓޮކް ނަގަން ޖެހޭނެ ކަމަށެވެ. އަދި އޭގެ ފަހުން ވެސް އެޕްސްޓޯއެއްގައި އެ އެޕް ހުރި ނަމަ ބޭނުން ކުރާ ކޮންމެ މީހަކަށް 5000 ޑޮލަރުގެ މަގުން އެޕްސްޓޯ ޖޫރިމަނާ ކުރެވޭނެ ކަމަށް އެ ގާނޫނުގައިވެއެވެެ.

އެމެރިކާގެ ސްޕްރީމް ކޯޓުން ޓިކްޓޮކް މަނާކުރަން ނިންމާފައިވާއިރު އަންނަ ހޯމަ ދުވަހު އެގައުމުގެ ސަރުކާރު ބަދަލުވެ އިންތިހާބީ ރައީސް ޑޮނަލްޑް ޓްރަމްޕް މަގާމުގެ ހުވާކުރައްވާނެއެވެ. ޓްރަމްޕް ވިދާޅުވެފައިވަނީ ޓިކްޓޮކް މަނާކުރުމާ މެދު އޭނާ ނިންމާ ނިންމުން ވަރަށް ކައިރި މުސްތަގުބަލެއްގައި ފެންނާނެ ކަމަށެވެ. އަދި ގޮތެއް ނިންމުމުގެ ކުރިން ހުރިހާ ކަމެއް ރިވިއުކުރަން ވަގުތު ބޭނުންވާ ކަމަށްވެސް ޓްރަމްޕް ވަނީ ވިދާޅުވެފައެވެ.