ޗައިނާގެ ކުންފުނިތަކުން ލަންކާގައި 10 ބިލިއަން ޑޮަލަރު އިންވެސްޓްކުރަން ނިންމާފައިވާ ކަމަށް ލަންކާގެ ނޫސްތަކުން ބުނެފި އެވެ،

ލަންކާގެ ރައީސް އަރޫނާ ކުމާރާ ޑިސަނަޔަކެ މި މަހުގެ 14 އިން 17އަށް ޗައިނާއަށް ރަސްމީ ދަތުރުފުޅެއް ކުރައްވައި އެ ގައުމުގެ އިސް ވެރިންނާ ބައްދަލުކުރައްވައި ރަސްމީ ވާހަކަތައް ބާއްވަވައިފައިވާއިރު ޗައިނާއިން ލަންކާއަށް ބޮޑެތި އެހީތައް ދޭން ވަނީ އެއްބަސްވެފަ އެވެ.

އެ ދަތުރުފުޅުގައި ދެ ގައުމުގެ އިސް ވެރިން ވަނީ އިންވެސްޓްމަންޓާއި ޑިޖިޓަލް ދާއިރާއާއި ޓޫރިޒަމްއާއި އެހެނިހެން މުހިންމު ދާއިރާތަކުން މަޝްވަރާާތައް ބާއްވައިފަ އެވެ. އަދި 15 އެމްއޯޔޫއެއްގައި ސޮއިވެސްކޮށްފައި ވެއެވެ.

ސޮއިކުރި އެއްބަސްވުންތަކުގެ ތެރެއިން އެންމެ މުހިންމު އެއް އެއްބަސްވުމަކީ ޗައިނާއިން ލަންކާގައި ތެޔޮ ސާފުކުރާ ރިފައިނަރީއެއް އެޅުމަށްވި އެއްބަސްވުމެވެ. ދުވާލަކު 200،000 ބެރެލްގެ ތެޔޮ އުފެއްދޭ އެ ރިފައިނަރީގެ އެއްބަސްވުމަކީ 3.7 ބިލިއަން ޑޮލަރުގެ އެއްބަސްވުމެވެ.

އޭގެ އިތުރުން ކޮލަމްބޯ ޕޯޓް ސިޓީއާއި ހަންބަންޓޯޓާ ޕްރޮޖެކެޓް ކުރިއަށް ގެންދަން ވެސް ވަނީ އެއްބަސްވެފަ އެވެ.

ލަންކާގެ ރައީސްގެ ދަތުރުފުޅާ ގުޅިގެން ބޭއްވި އިންވެސްޓްމަންޓް ފޯރަމްގައި ބައިވެރިވި ކުންފުނިތަކުން ލަންކާގައި 10 ބިލިއަން ޑޮލަރުގެ އިންވެސްޓްމަންޓްތައް ކުރަން ތައްޔާރަށް ތިބިކަމަށް ލަންކާގެ ނޫސްތަކުން ބުނެފައި ވެއެވެ.