އެމްއެމްޕީއާރުސީ ތެރޭ ހިންގި ބޮޑު ހިޔާނާތުގެ ކުށް ސާބިތުވެފައިވާ ކުރީގެ ނާއިބު ރައީސް އަޙްމަދު އަދީބާއި އޭރު އެކަމުގައި ޝާމިލުވި ބައެއް ފަރާތްތަކާއެކު ހަދާފައިވާ އެއްބާރުލުން ދިނުމުގެ އެއްބަސްވުންތައް އުވާލަން ނިންމައިފިއެވެ.

ޕްރޮސެކިއުޓަރ ޖެނެރަލްގެ އޮފީހުން މިއަދު ބުނެފައިވަނީ އެ މައްސަލާގައި ހިމެނޭ އަޙްމަދު އަދީބާއި، އެމްއެމްޕީއާރުސީ މެދުވެރިކޮށް ފަޅުރަށްތައް ވިއްކި ފައިސާތައް އެންމެ ގިނައިން ޖަމާކޮށްފައިވާ އެސްއޯއެފް ކުންފުނީގެ އިސްކޮށް އުޅުއްވި ފަރާތްތަކާއެކު އެކުލަވާލާފައިވާ އެއްބާރުލުން ދިނުމުގެ އެއްބަސްވުންތައް އުވާލަން ނިންމާފައިވާ ކަމަށެވެ.

އަދި އެއްބަސްވުމުގެ ބޭނުމަކީ އެ މައްސަލައިގެ ތަހުގީގު ކުރިއަށް ގެންދިއުމަށާއި ގެއްލިފައިވާ ފައިސާ އަނބުރާ ހޯދުމަށް އެއްބާރުލުން ދިނުންކަމުގައި ވިޔަސް ތަހުގީގަށާއި ގެއްލިފައިވާ ފައިސާ ހޯދުމަށް އެއްވެސް އެހީތެރިކަމެއް އެ ފަރާތްތަކުން ލިބެމުން ނުދާ ކަމަށް ތަހުގީގީ އިދާރާތަކުން އަންގާފައިވާ ކަމަށް ޕީޖީ އޮފީހުން ބުނެފައިވެއެވެ.

އެގޮތުން ހ. ސާމަރާ، އަޙްމަދު އަދީބު ޢަބްދުލްޣަފޫރާއި، މ. ލޭންޑް އޮފް ގާޑެން، އަޙްމަދު އިޝްފާޙް ޢަލީއާއި، މ. ސެސްނާ، މުޙައްމަދު ޢައްލާމް ލަޠީފް އަދި ގ. އޮއިވާލި، މުޙައްމަދު ޙުސައިން އާއެކު ހަދާފައިވާ އެއްބަސްވުން އުވާލަން ޕީޖީން ވަނީ ނިންމާފައެވެ.

މި މައްސަލާގައި ކުށްސާބިތުވި އެމްއެމްޕީއާރުސީގެ އޭރުގެ މެނޭޖިންގ ޑިރެކްޓަރު އަބްދުﷲ ޒިޔަތާއެކު ހަދާފައިވާ އެއްބާރުލުން ދިނުމުގެ އެއްބަސްވުން 2022 ވަނަ އަހަރުގެ އޮގަސްޓް މަހުގެ ތެރޭގައި އުވާލާފައިވާކަމަށް ޕީޖީ އޮފީހުން ވަނީ ބުނެފައެވެ.

ޕީޖީ އޮފީހުން ބުނީ އެ އެއްބަސްވުންތައް ނިމުމަކަށް ގެނައުމާއެކު، އެއްބަސްވުންތަކުގެ ސަބަބުން ކުރިއަށް ނުގެންދެވި ހުރި، އެ މީހުންގެ މައްޗަށް ތުހުމަތުކުރެވޭ މައްސަލަތަކުގެ ތަހުގީގު ކުރިއަށްގެންގޮސް ވީ އެންމެ އަވަހަކަށް ޕްރޮސެކިއުޓަރ ޖެނެރަލްގެ އޮފީހަށް ހުށަހެޅުމަށް، ދިވެހި ފުލުހުންގެ ޚިދުމަތަށާއި، އެންޓި-ކޮރަޕްޝަން ކޮމިޝަނަށް އަންގާފައިވާނޭ ކަމަށެވެ.