އިސްރާއީލުން ޣައްޒާއަށް އަރައި ކުރި ހަނގުރާމައިގައި އަސީރުންގެ ގޮތުގައި ހައްޔަރު ކުރި މީހުންގެ ތެރެއިން 90 މީހުން ދޫކޮށްފިއެވެ.

ހަނގުރާމަ ހުއްޓާލުމަށް ވި އެއްބަސްވުމާ އެއްގޮތަށް އިސްރާއީލުން ފުރަތަމަ ދޫކުރި 90 މީހުންގެ ތެރޭގައި ފަލަސްތީނުގެ ކުޑަކުދިންނާއި އަންހެނުން ހިމެނެއެވެ. ދޫކޮށްލި އެންމެންގެ ހާލުވެސް ރަނގަޅުކަމަށް ރިޕޯޓްތައް ބުނާއިރު އެމީހުންނާ ހަވާލުވާން ހުޅަނގު އައްސޭރިއަށް ގިނަ ބަޔަކު ވަނީ އެއްވެފައެވެ.

އަސީރުން ބަދަލުކުރުމުގެ މަސައްކަތުގެ ދަށުން ހަމާސްއިން ހައްޔަރުކޮށްފައި ތިބި އިސްރާއީލުގެ ތިން މީހަކު މީގެ ހަތް ގަޑިއިރު ކުރިން ވަނީ ދޫކޮށްލާފައެވެ.

ހޯމަ ދުވަހުގެ ހެނދުނު އެކެއް ޖަހާ އެހާކަންހާއިރު (ޖީއެމްޓީ ގަޑިން 23:00) ފަލަސްތީނުގެ 90 ގައިދީންނާއެކު ރެޑްކްރޮސްގެ ބަސްތައް ހިފާފައިވާ ހުޅަނގު އައްސޭރީގެ ރަމަاللهއަށް އައިސް އަސީރުންގެ އާއިލާތަކާ ވަނީ ހަވާލުކޮށްފައެވެ.

މިނިވަންވި ފަލަސްތީނުގެ މީހުންގެ ތެރޭގައި ހިފާފައިވާ ހުޅަނގު އައްސޭރިއާއި ގުދުސްގެ 69 އަންހެނުންނާއި 21 ފުރާވަރުގެ ފިރިހެން ކުދިން ހިމެނެއެވެ. ކުދިންގެ ތެރޭގައި 12 އަހަރުގެ ކުދިންވެސް ހިމެނެއެވެ.

ހަމާސް އާއި އިސްރާއީލާ ދެމެދު ގައިދީން އެންމެ ފަހުންވެސް ބަދަލުކޮށްފައި ވަނީ ނޮވެމްބަރު 2023 ގައެވެ.

ހަނގުރާމަ ހުއްޓާލުމުގެ އެއްބަސްވުމުގެ ތެރެއިން ދޫކޮށްލަން ޖެހޭ ފަލަސްތީނުގެ މީހުންގެ ސީދާ އަދަދެއް އަދި ނޭނގޭއިރު، ރިޕޯޓްތައް ބުނާ ގޮތުގައި އެމީހުންގެ އަދަދު ގާތްގަނޑަކަށް 1،000 އާއި 2،000 އާ ދެމެދުގެ އަދަދަކަށް އަރާނެ ކަމަށް ބެލެވެއެވެ.

މި އެއްބަސްވުމުގެ ފުރަތަމަ މަރުހަލާގައި ކުރިއަށް އޮތް 42 ދުވަހުގެ ތެރޭގައި ހަމާސްއިން ޖުމްލަ 33 އިސްރާއީލުގެ އަސީރުން އަނބުރާ ފޮނުވާލާނެ ކަމަށް ބެލެވެ އެވެ. ދެން އެންމެ އަވަހަށްވެސް އަސީރުން ދޫކޮށްލުމަށް ހަމަޖެހިފައި ވަނީ މި ހަފްތާގެ ހޮނިހިރު ދުވަހުގަ އެވެ.

މި ހަނގުރާމަ ހުއްޓާލުމުގެ ދެވަނަ ފިޔަވަހީގެ މަޝްވަރާތައް ދެ ހަފްތާ ފަހުން ފެށުމަށް ވަނީ ހަމަޖެހިފައެވެ.

އޮކްޓޯބަރު މަހުގެ ހަތް ވަނަ ދުވަހު އިސްރާއީލް-ޣައްޒާ ހަނގުރާމަ ފެށުނު ފަހުން ފަލަސްތީނުގެ 46،000 އަށް ވުރެ ގިނަ މީހުން މަރުވެފައިވާއިރު، އިސްރާއީލުގެ އަމުރުތަކާއި ހަމަލާތަކުގެ ސަބަބުން ޣައްޒާގެ އާބާދީގެ ގާތްގަނޑަކަށް 90 އިންސައްތަ މީހުން ވަނީ ގަދަކަމުން ގެދޮރު ދޫކޮށް ގޮސްފަ އެވެ.