ޑޮނަލްޑް ޓްރަމްޕް އެމެރިކާގެ 47 ވަނަ ރައީސް ކަމުގެ ހުވައި މިއަދު ކުރައްވައިފިއެވެ. މިއީ އެމެރިކާގެ ރައީސްކަމުގެ މަގާމު ޓްރަމްޕް ކުރައްވާ ދެވަނަ ފަހަރެވެ.

ދުނިޔޭގެ އެންމެ ވަރުގަދަ ބާރުތަކުގެ ތެރޭގައި ހިމެނޭ އެމެރިކާގެ ރައީސް ކަމުގެ މަގާމު މީގެކުރިންވެސް ޓްރަމްޕް އަދާކުރެއްވިއެވެ. އެގޮތުން ޓްރަމްޕް ރައީސްކަން ކުރެއްވީ 2017 ވަނަ އަހަރުން ފެށިގެން 2021 އަށް އެ ގައުމުގެ 45 ވަނަ ރައީސްގެ ގޮތުގައެވެ.

ރައީސްގެ ކަމުގެ ދައުރު ހަމަވެގެން ބޭއްވި ރިޔާސީ އިންތިހާބުގައިވެސް ޓްރަމް ވާދަކުރެއްވިއެވެ. ނަމަވެސް މިއަދާ ހަމައަށް އެމެރިކާގެ ރައީސް ކަމުގައި ހުންނެވި ޖޯ ބައިޑަންއާއި ވާދަކުރައްވައި ޓްރަމްޕަށް އިންތިހާބު ނާކާމިޔާބުވެ ދެވަނަ ދައުރެއް ލިބިވަޑައި ނުގަތީއެވެ.

ރައީސްކަމުގެ ހުވައި ޓްރަމްޕް ކުރެއްވީ އެމެރިކާގެ ވެރިރަށް ވޮޝިންޓަނުގައި ހުންނަ ކެޕިޓަލް ހިލްގައެވެ.

އެމެރިކާގައި އެންމެ ފަހުން ބޭއްވި ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓް އަދި ކުރީގެ ނައިބު ރައީސް ކަމަލާ ހެރިސްއާ ވާދަކުރައްވައި ޓްރަމްޕް އިންތިހާބު ކާމިޔާބު ކުރެއްވިއެވެ. އެގޮތުން އުމުރުން 78 އަހަރުގެ ޓްރަމްޕް އިންތިހާބު ކާމިޔާބު ކުރެއްވީ 277 އިލެކްޓޯރަލް ވޯޓުންނެވެ. ކަމަލާއަށް ލިބިވަޑައިގަތީ 224 އިލެކްޓޯރަލް ވޯޓެވެ.

ރައީސް ޓްރަމްޕް މިފަހަރު ރިޔާސީ ދައުރު ފުރިހަމަކުރައްވައިފި ނަމަ، އޭނާ ވާނީ އެމެރިކާގެ ވެރިކަން ކުރައްވާ އުމުރުން އެންމެ ދޮށީ ރައީސަށެވެ. އެގޮތުން ޓްރަމްޕް ދައުރު ނިންމާލާ އިރު، އުމުރުން 82 އަހަރުވާނެއެވެ.