ސުލްހައިގެ ދަނޑިވަޅުގައި އަނެއްކާވެސް ނިރުބަވެރި އިސްރާއީލުން ހުޅަނގު އައްސޭރީގެ ރަށްތަކަށް ހަމަލާދީފައިވާ ކަމަށް އޮފިޝަލުންނާ ހަވާލަދީ ބޭރުގެ މީޑިޔާތަކުން ރިޕޯޓުކޮށްފިއެވެ.

ފަލަސްތީނުގެ ރެޑް ކްރެސެންޓުން ބުނީ ގުދުސްގެ އުތުރުގައި އޮންނަ ހުޅަނގު އައްސޭރީގައި އިސްރާއީލުން ހިފާފައިވާ ދެ ރަށަކަށް އިސްރާއީލުގެ ވަޒަންވެރިން ވަދެ ފަލަސްތީނުގެ ގެތަކާއި ނާސަރީއަކާއި ލޯކަލް ވިޔަފާރިއެއް އަންދާލާފައިވާ ކަމަށެވެ. ކުއްލިއަކަށް ދިން މި ހަމަލާގައި 12 މީހަކަށް އަނިޔާވެފައިވާ ކަމަށް ރެޑް ކްރެސެންޓުން ވަނީ ބުނެފައެވެ.

ފަލަސްތީނުގެ ނޫސް އެޖެންސީ ވަފާ އިން ރިޕޯޓްކުރާ ގޮތުގައި ރޭގަނޑުގެ ވަގުތެއްގައި ހިންގި މި ހަމަނުޖެހުންތަކުގައި އިސްރާއީލުގެ ސިފައިން އެގައުމުގެ ވަޒަންވެރިންނަށް ތާއީދުކުރި ކަމަށެވެ. އަދި ހުޅަނގު އައްސޭރީގައި ހިންގި މި އަސްކަރީ ޙަމަލާތަކުގައި ފަލަސްތީނުގެ ދިހަވަރަކަށް މީހުން ހައްޔަރުކޮށްފައިވާ ކަމަށެވެ.

އިސްރާއީލުން ފަލަސްތީނަށް މި ހަމަލާ ދީފައިވަނީ ޣައްޒާގެ ހަނގުރާމަ ހުއްޓާލުމުގެ އެއްބަސްވުމުގެ ތެރެއިން އިސްރާއީލުން ފަލަސްތީނުގެ 90 މީހުން ދޫކޮށްލިތާ ގަޑިއެއްހާއިރު ފަހުންނެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މަދުވެގެން 47،035 ފަލަސްތީނު މީހުން މަރުވެ 111،091 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަދުވެގެން 1،139 މީހުން މަރުވެ 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.