ގައުމަށް ދިމާވެފައިވާ މައްސަލަތައް ހައްލު ކުރުމުގައި ރައީސް ކުރައްވަމުންދާ މަސައްކަތްތަކުގެ ސަބަބުން އެމަނިކުފާނަށް ރައްޔިތުންގެ އިހްތިރާމާއި ލޯބި ލިބެމުންދާކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.

މިއަދު އެކްސްގައި ހިއްސާ ކުރެއްވި ޕޯސްޓެއްގައި މިނިސްޓަރ ސައީދު ވިދާޅުވީ ރައީސް ޑރ. މުއިއްޒު ވެރިކަމާ ހަވާލުވެ ވަޑައިގެންނެވިއިރު ގައުމުގެ މާލީ ނިޒާމު ވަނީ އަނދަވަޅެއްގެ ތެރޭގައި ކަމަށާއި، ގައުމު ދަރާވިކި، ސަރުކާރުގެ ކުންފުނިތަކާއި ސަރުކާޜުގެ ހިންގުން އެފުއް މިފުށަށް ޖެހިފައިވާ ކަމަށެވެ.

އަދި މި މައްސަލަތަކުން އަރައިގަނެ މައްސަލަަތައް ހައްލު ކުރުމުގައި ރައީސް އިސްކުރެއްވީ ކެއްތެރިކަމާއި ބުރަ މަސައްކަތް ކަމަށް މިނިސްޓަރ ވިދާޅުވިއެވެ. އަދި އެކަމުގެ ސަބަބުން އެމަނިކުފާނުގެ މައްޗަށް ރައްޔިތުންގެ ހިތްތަކުގައިވާ ލޯތްބާއި އިހްތިރާމު އިތުރުވެފައިވާ ކަމަށްވެސް މިނިސްޓަރ ވިދާޅުވިއެވެ.

ރައީސް ޑރ.މުޢިިއްޒުއާއި ވެރިކަންހަވާލުވިއިރު ޤައުމުގެމާލީނިޒާމު ވަނީއަނދަވަޅެއްގަ. ދަރާވިކި،ސަރުކާރުގެ ކުންފުނިތަކާއި ސަރުކާރުހިންގުންއެފުށްމިފުށަށްޖެހިފަ.
މައްސަލަތައް ހައްލުކުރުމުގައި އެމަނިކުފާނު އިސްކުރެއްވީކެތްތެރިކަން.ބުރަމަސައްކަތް. އިތުރުވީރައްޔިތުންގެލޯތްބާއި އިޙްތިރާމް pic.twitter.com/tL3CaIlvRm

— Mohamed Saeed (@em_saeed) January 22, 2025

ރައީސް މުޢިއްޒު ތަކުރާރުކޮށް ވިދާޅުވަމުން ގެންދަވަނީ އެމަނިކުފާނު ސަރުކާރާ ހަވާލުވެވަޑައިގެންނެވިއިރު ރާއްޖޭގެ އިގްތިސާދީ ހާލަތު ވަނީ ވަރަށް ބޮޑަށް ދަށަށް ގޮސްފައި ކަމަށެވެ. އަދި އެކަމުގެ ސަބަބުން ކުރީގެ ސަރުކާރުން ފަށާފައިވާ އެތައް މަޝްރޫއުތަކެއް ވަނީ މެދުކެނޑިފައި ކަމަށް އެނަނިކުފާނު ވިދާޅުވެފައި ވެއެވެ.

މިހާރު ރައީސް މުޢިއްޒު ރ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި ރައްޔިތުންނާ މުހާތަބުކުރަށްވައި ވިދާޅުވެފައި ވަނީ ރަށްތަކުގައި ހުއްޓިފައިވާ މަޝްރޫއުތައް އަލުން ފަށައި ކުރިއަށް ގެންދެވޭނެ މަގެއް ސަރުކާރުން ހޯއްދަވާފައިވާ ކަމަށެވެ. އަދި އެ މަޝްރޫއުތަކުގެ މަސައްކަތްތައް ވަރަށް އަވަހަށް ކުރިއަށް ގެންދަވާނެ ކަމަށްްވެސް ރައީސް ވިދާޅުވިއެވެ.

އަދި ރާއްޖެ ތަރައްގީ ކުރުމަށް ބޮޑު އިސްކަމެއް ދީގެން މި ސަރުކާރުން މަސައްކަތް ކުރާނެ ކަމަށްވެސް މިދަތުރުފުޅުގައި ރައީސް ވިދާޅުވިއެވެ.