އިރުމަތީ ގުދުސްގައި ހަރަކާތްތެރިވާ އދ. ގެ އިންސާނީ އެހީދޭ ޖަމިއްޔާ، ޔޫއެންއާރުޑަބްލިއުއޭގެ ހަރަކާތްތައް ހުއްޓާލުމަށް ނިރުބަވެރި އިސްރާއީލުން އަންގައިފިއެވެ.

އިސްރާއީލުން ހިފާފައިވާ އިރުމަތީ ގުދުސްގައި އދ. އިން ހިންގަމުން ގެންދާ ފަލަސްތީނުގެ ރެފިއުޖީ އެޖެންސީގެ އިންސާނީ އެހީދިނުމުގެ ހުރިހާ އޮޕަރޭޝަންތައް ހުއްޓާލުމަށް އިސްރާއީލުން ވަނީ ހުކުރު ދުވަހު އަންގާފައެވެ.

ނިރުބަވެރި އިސްރާއީލުގެ ގާނޫނު ހަދާ މަޖިލީހުގެ މެމްބަރުން އޮކްޓޯބަރު މަހު ވަނީ ޔޫއެންއާރުޑަބްލިއުއޭ އެގައުމުން މަނާކޮށް، އިސްރާއީލުގެ ކަމާބެހޭ ފަރާތްތަކުން އެ އިދާރާއާ ގުޅުން މަނާކުރާ ގާނޫނެއް ވެސް ފާސްކޮށްފަ އެވެ. އދ. ގެ މި ޖަމިއްޔާ އަކީ ވަކި ނަސްލަކަށް، ވަކި ޖަމާއަތަކަށް، ވަކި ދީނަކަށް ބެލުމެއް ނެތި ހުރިހާ އިންސާނުންނަށް އެހީތެރިވަމުންދާ ހިލޭސާބަހަށް މަސައްކަތް ކުރާ ޖަމިއްޔާއެކެވެ.

އދ. ހިމެނޭ ގޮތަށް ބައިނަލްއަގްވާމީ މުޖުތަމައުގެ ގިނަ ބަޔަކު ދެކޭ ގޮތުގައި އިރުމަތީ ގުދުސް އާއި ހުޅަނގު އައްސޭރިއާއި ޣައްޒާއަކީ އިސްރާއީލުން ހިފާފައިވާ ސަރަހައްދެކެވެ. ނަމަވެސް އިޒްރޭލު ސަރުކާރުން ދެކެނީ މުޅި ގުދުސް އަކީ އެގައުމުގެ ބައެއްގެ ގޮތުގައެވެ.

ޔޫއެންއާރުޑަބްލިއުއޭ އިން ބުނާގޮތުގައި އިރުމަތީ ގުދުސްގައި އޮޕަރޭޝަންތައް ހުއްޓާލުމަށް އިސްރާއީލުން ނެރުނު އަމުރަކީ އދ.ގެ މެމްބަރު ގައުމެއްގެ ގޮތުގައި އެގައުމު އޮވެ ބައިނަލްއަގްވާމީ ވާޖިބުތަކާ ފުށުއަރާ އަމުރެއް ކަމަށެވެ.

މެދުއިރުމަތީގެ އެކި ހިސާބުތަކުގައި ފަލަސްތީނުގެ ރެފިއުޖީންނާއެކު މަސައްކަތްކުރާ ޔޫއެންއާރުޑަބްލިއުއޭގެ ޖުމްލަ 30،000 މީހުން މިހާރުވެސް އެބަތިއްބެވެ.