ޖަމިއްޔަތުއްސަލަފުން ވަކިވި އަލީ ރަމީޒު ދީނީ ކަންކަމަށް ދައުވަތު ދިނުމަށް އަމިއްލަ ޖަމިއްޔާއެއް އުފައްދަވައިފިއެވެ.

"މަންފާ" ގެ ނަމުގައި އަލަށް އުފެއްދި މި ޖަމިއްޔާއާ ގުޅޭގޮތުން ފޭސްބުކްގައި ޢަލީ ރަމީޒު ވިދާޅުވީ، އެ ޖަމިއްޔާއަކީ އިސްލާމް ދީނުގެ ރިވެތި ވައުދާއި އިރުޝާދު މީސްތަކުންނަށް ފޯރުކޮށްދީ، އިސްލާމް ދީނުގެ ދަންމަރު މިދީބުގައި ނެގެހެއްޓުމުގެ މަތިވެރި ނިޔަތާއެކު، ދީނީ، އިންސާނީ އަދި އިޖްތިމާއީ ރޮނގުން އިސްލާމީ އުއްމަތަށް މަންފާ ހޯދައިދިނުމަށް މަސައްކަތްކުރުމުގެ މާތް މަގުސަދުގައި އުފެއްދި ޖަމިއްޔާއެއް ކަމަށެވެ.

އަދި މަންފާ ޖަމިއްޔާ މިހާރު ރަޖިސްޓްރީކޮށް ނިމިފައިވާކަމަށް ވެސް ޢަލީ ރަމީޒު ވަނީ ވިދާޅުވެފައެވެ.

ލޮބުވެތި މުސްލިމް އަޚުންނާ އުޚްތުން:

އިސްލާމް ދީނުގެ ރިވެތި ވަޢުޡާއި އިރުޝާދު މީސްތަކުންނަށް ފޯރުކޮށްދީ، މިދީނުގެ ދަންމަރު މިދީބުގައި ނެގެހެއްޓުމުގެ މަތިވެރި ނިޔަތާއެކު، ދީނީ، އިންސާނީ އަދި އިޖްތިމާޢީ ރޮނގުން އިސްލާމީ އުއްމަތަށް މަންފާ ހޯދައިދިނުމަށް މަސައްކަތްކުރުމުގެ މާތް… pic.twitter.com/Xhc68HJngH

— Ali Rameez (@aliramyz) January 30, 2025

ޢަލީ ރަމީޒަކީ ސަލަފު ޖަމިއްޔާގައި ދީނީ އެކި މަސައްކަތްތަކުގައި، ދީނީ ޝިޢާރު ފާޅުކުރުމުގައި ވަރަށް ގިނަ އަހަރުތަކެއް ވަންދެން އިސްކޮށް އުޅުއްވި ބޭފުޅެކެވެ. ރާއްޖޭގައި މޮޅު ލަވަކިއުންތެރިއެއްގެ ގޮތުގައި މަޝްހޫރުވެގެންދިޔަ އަލީ ރަމީޒު ލަވަކިއުން ހުއްޓާލިފަހުން މުޅިންހެން ފެންނަމުން އައިސްފައި ވަނީ ސަލަފުގެ އެކި ދީނީ ހަރަކާތްތަކުންނެވެ. އެގޮތުން ސަލަފުގެ ދީނީ ޝިޢާރާއި ދީނީ ނަސޭހަތްތައް އެކުލެވޭ ޕްރޮގްރާމްތައް ހުށައަޅައި ދެއްވުމުގެ އިތުރުން ސަލަފު ޖަމިއްޔާއިން އުފައްދާފައިވާ ސަލާތު އެޕް އަދި ދީނީ ގިނަ ޕްރޮގްރާމްތަކަކީ ޢަލީ ރަމީޒުގެ އިސްނެގުމާއި ބައިވެރިވުން ފެނިގެން ގޮސްފައިވާ މަސައްކަތްތަކެކެވެ.

ޢަލީ ރަމީޒު ސަލަފުން ވަކިވެވަޑައިގެންނެވިކަން ހާމަކުރައްވާފައި ވަނީ މިދިޔަ އަހަރުގެ ޑިސެންބަރު 21 ގައެވެ. ނަމަވެސް، އެ ޖަމިއްޔާއިން ވަކިވީ ކީއްވެކަމެއް އޭނާ ހާމަކުރައްވާފައެއް ނުވެއެވެ.