ދުންފަތުގެ އިސްތިއުމާލުކުރުމަށް އަލަށް ވަންނަ ކުދިން އެކަމުން ދުރުކުރުމުގެ ތަންފީޒުކުރަން ނިންމާފައިވާ "ޖެނެރޭޝަން ބޭން" ގެ ދަށުން ދުންފަތް މަނާކުރަން މަޝްވަރާކުރަމުންދަނީ 2000 އާއި 2007 އާ ދެމެދުގެ ފަހުން އުފަންވި ފަރާތްތަކަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

"ޖެނެރޭޝަން ބޭން"ގެ ސިޔާސާތު ތަންފީޒުކުރަން ނިންމާފައިވާކަން ރައީސް މުއިއްޒު ހާމަކުރެއްވީ މިދިޔަ މަހުގެ 27 ވަނަ ދުވަހު "ރައްޔިތުންނާ އެކު" ނަމުގައި ރައީސް އޮފީހުން ފެށި ޕޮޑްކާސްޓްގެ ފުރަތަމަ އެޕިސޯޑުގައި ވާހަކަފުޅު ދައްކަވަމުން ނެވެ.

"ރައްޔިތުންނާ އެކު"ގެ ދެވަނަ އެޕިސޯޑުގައި އެމަނިކުފާނު މިއަދު ވިދާޅުވީ ދިރާސާތައްކޮށް "ޖެނެރޭޝަން ބޭން"އާ ގުޅޭ ކެބިނެޓް ޕޭޕަރެއް ހަދަން ހެލްތު މިނިސްޓަރު އަބްދުﷲ ނާޒިމްއާ މިހާރު ހަވާލުވެސް ކޮށްފައިވާ ކަމަށެވެ.

އެކަމާ ގުޅޭގޮތުން ގޮތެއް ނިންމާނީ ވަރަށް ތަފްސީލުކޮށް ބެލުމަށްފަހު ކަމަށާއި އަދި އެކަމާ ގުޅޭ ގޮތުން ރާއްޖޭގެ ކަމާ ބެހޭ ފަރާތްތަކުގެ މަޝްވަރާވެސް ހޯއްދަވާނެ ކަމަށް ވެސް ރައީސް ވިދާޅުވި އެވެ.

"ދެތިން ގޮތެއް ހުށަހަޅަން މި ވިސްނަނީ ކެބިނެޓްގައި މަޝްވަރާކޮށްފައި ގޮތެއް ނިންމަން، އެއްގޮތަކީ 2007 ވަނަ އަަހަރުގެ ޖެނުއަރީ އެކަކުން ފެށިގެން އުފަންވީ ހުރިހާ ކުދިން. އެ ކުދިންގެ އުމުރުން ކުރިއަށް އޮތް ތަނުގައި ވެސް ސިނގިރޭޓާއި ދުންފަތުގެ އިސްތިއުމާލު ނުކުރެވޭ ގޮތް ހެދުން. ދެވަނަ ގޮތަކީ 2004 ވަނަ އަހަރުގެ ޖެނުއަރީ އެކަކުން ފެށިގެން އުފަންވެފައިވާ ހުރިހާ ކުދިންނަށް ސިނގިރެޓާއި ދުންފަތުގެ އިސްތިއުމާލުނުކުރެވޭ ގޮތަށް ހަދަން. ދެން ހަމަ އެއަށްވުރެ އުމުރުން މައްޗަށްދާ ކަމަށްވަންޏާ 2000 ވަނަ އަހަރުގެ ޖެނުއަރީ މަހުގެ އެކަކުން ފެށިގެން ދުންފަތުގެ އިސްތިއުމާލު ނުކުރެވޭ ގޮތަށް ހަދަން." ރައީސް ވިދާޅުވި އެވެ.