މީހާ މާ ބޮޑަށް ފަލަވެ، ބަރުދަން އިތުރު ވުމަކީ އޭގެ ސަބަބުން ތަފާތު އެކި ސިއްހީ މައްސަލަތައް ކުރިމަތިވާ ކަމެކެވެ. އެހެންވެ ދުޅަހެޔޮ ސިއްހަތެއްގައި ހުންނަން ބޭނުންނަމަ ބަރުދަން ލުއި ކުރަން މަސައްމަތްކުރުމަކީ ކޮންމެހެންވެސް ކުރަންޖެހޭ ކަމެކެވެ. ބަރުދަން ލުއިކުރަން މަސައްކަތްކުރާ ގިނަ މީހުންގެ އެންމެ ބޮޑު ޝަކުވާއަކީ ޑައިޓުކޮށްގެން ވެސް، ކަސްރަތު ކޮށްގެން ވެސް ބަރުދަން ލުއިނުވާކަމެވެ. މިކަންތައް ކޮށްގެންވެސް ބަރުދަން ލުއިނުކުރެވޭ ނަމަ މުރަނގަ ޑިޓޮކްސް ތަޖުރިބާ ކޮށްލުމަކީ ރަނގަޅުކަމެކެވެ.

މުރަނގަފަތަކީ އޭގައި ގިނަ އަދަދަކަށް އެންޓިއޮކްސިޑެންޓްތަކާއި، ވިޓަމިނާއި، މިނަރަލް އެކުލެވޭ އެއްޗެކެވެ. މުރަނގަ ޑިޓޮކްސް ފެން ބޭނުން ކުރުމުން މީހާގެ މެޓަބޮލިޒަމް ރަނގަޅުވެ، ކާއެއްޗެހި ރަނގަޅަށް ހަޖަމުވެ، ހަށިގަނޑުގައި ހުންނަ ސަރުބީ ފަސޭހަކަމާއެކު ވިރެއެވެ. އަދި މި ބޭނުންކުރުމުން ހަށިގަނޑުގައި ހަކުރު ހުންނަ ވަރު އެއް ހަމައެއްގައި ހިފަހައްޓައިދީ، ބްލޯޓްވުމުންނާއި އިންފްލެމޭޓްވުމުން ހަށިގަނޑު ދުރުކޮށްދެއެވެ. މިކަމުގެ ސަބަބުންވެސް ބަރުދަން ލުއިކުރަން ފަސޭހަވެއެވެ.

މި ތައްޔާރު ކުރުމަށް ބޭނުންވާނީ މުރަނގަ ޕައުޑަރު ނުވަތަ މުރަނގަފަތާއި، ތާފެނާ ފެނާއި، ލުނބޯހުތް އަދި މާމުޔެވެ. މި ބުއިން ތައްޔާރުކުރުމަށްޓަކައި ހުރިހާ އެއްޗެއް މިކްސަރަށް އެޅުމަށްފަހު ރަނގަޅަށް އެއްކޮށްލާނީއެވެ. އަދި އެއަށްފަހު ހުސްބަނޑާހުރެ ބޯލާނީއެވެ.

ހެނދުނު ހޭލާފައި މި ބުއިމުން ހަށިގަނޑުގެ މެޓަބޮލިޒަމް ރަނގަޅު ވެއެވެ. އަދި ކެއުމުގެ ކުރިން މި ބުއިމުން ބަނޑުހައިވާ މިންވަރު ކުޑަވެ، ކާއެއްޗެހި ކެވޭ ވަރުވެސް ކޮންޓްރޯލުވެއެވެ. މީގެ އިތުރުން ރޭގަނޑު މި ބޭނުންކުރުމުން ހަޖަމުގެ ނިޒާމުގެ މަސައްކަތް ވެސް ރަނގަޅުވެއެވެ.

މި ބޭނުންކުރުމުން ބަރުދަން ލުއިވުމުގެ އިތުރުން ވެސް ވަރަށް ގިނަ ފައިދާތައް ހަށިގަނޑަށް ލިބެއެވެ. އެގޮތުން ލިބޭ ފައިދާތަކުގެ ތެރޭގައި ފުރަމޭ ޑިޓޮކްސްވުމާއި، ހަމުގެ މައްސަލަތައް ހައްލުވުމާއި، މީހާގެ ދިފާއީ ނިޒާމު ވަރުގަދަވުން ހިމެނެއެވެ. ވީމާ މިއީ ކޮންމެ މީހަކުވެސް ތަޖުރިބާ ކޮށްލަން ޖެހޭ ބުއިމެކެވެ.