އެމްޑީޕީގެ ކުރީގެ ރައީސް މުޙައްމަދު ނަޝީދު އަލުން އެޕާޓީއަށް ގުޅިވަޑައިގަންނަވާނަމަ އެކަމަށް މަރުޙަބާ ވިދާޅުވާނެ ކަމަށާއި އެހެން ނަމަވެސް އެމްޑީޕީގެ މެންބަރުންގެ ތާޢީދު ހޯއްދެވުމަކީ ރައީސް ނަޝީދު އަމިއްލަފުޅަށް ކުރަށްވަންޖެހޭ ކަމެއް ކަމަށް އެމްޑީޕީގެ ޗެއަރޕާސަން ފައްޔާޒް އިސްމާޢީލް މިއަދު ވިދާޅުވެއްޖެއެވެ.

ފައްޔާޒް މިބީދައިން ވިދާޅުވީ މިވަގުތު ރާއްޖެއަށް އެންމެ ރަނގަޅު ގޮތަކީ އެމްޑީޕީއާއި ޑިމޮކްރެޓްސް ގުޅިގެން ސިޔާސީ މަސައްކަތް ކުރުން ކަމަށް ރައީސް ނަޝީދު ވިދާޅުވުމާ ގުޅިގެންނެވެ.

އެކަމާ ގުޅިގެން ރާއްޖޭގެ މީޑިއާއަކަށް މިއަދު ދެއްވި ބަސްދީގަތުމެއްގައި ފައްޔާޒް ވިދާޅުވީ އެމްޑީޕީގެ ސްޓޭންޑަކީ ރާއްޖޭގައި ޑިމޮކްރަސީ ދަމަހައްޓަން މަސައްކަތްކުރާ ކޮންމެ ބަޔަކާ ގުޅިގެންވެސް ސިޔާސީ މަސައްކަތް ކުރުން ކަމަށެވެ.

ހަމައެއާއެކު 2023 ވަނަ އަހަރުގެ ރިޔާސީ އިންތިޚާބުގައި ރައީސް ނަޝީދާއި ޑިމޮކްރެޓުން ޢަމަލުކުރި ގޮތުން އެމްޑީޕީގެ މެންބަރުންގެ ނުރުހުން ރައީސް ނަޝީދަށް އޮތްކަން ފައްޔާޒް ފާހަގަ ކުރެއްވިއެވެ. އެހެން ނަމަވެސް އެމްޑީޕީގެ ދޮރަކީ އެންމެނަށްވެސް ހުޅުވިފައިވާ ދޮރެއް ކަމަށާއި އެހެންކަމުން ރައީސް ނަޝީދަށްވެސް މަރުޙަބާ ވިދާޅުވާނެ ކަމަށް ފައްޔާޒް ވިދާޅުވިއެވެ.

“ހިތްހަމަ ނުޖެހުން އެބަހުރި މެންބަރުންގެ. ދެން ރައީސް ނަޝީދުގެ ކަމެއް ދެއްތޯ މެންބަރުންގެ ރުހުން ހޯއްދެވުން.” ފައްޔާޒް ވިދާޅުވިއެވެ.

ފައްޔާޒް މިހެން ވިދާޅުވެފައިވާއިރު ޑިމޮކްރެޓްސްއަކީ ކުރީގެ ރައީސް ސާލިޙްގެ ވެރިކަމުގައި އެމްޑީޕީގެ އެތެރޭގައި އުފެދުނު ޚިޔާލު ތަފާތުވުންތަކާ ގުޅިގެން ރައީސް ނަޝީދަށް ތާއިދުކުރާ އެމްޑީޕީގެ މެންބަރުން އިސްކޮށް ތިބެ އުފެއްދި ޕާޓީއެކެވެ.

ނަމަވެސް ޑިމޮކްރެޓްސް އުފެއްދުުމުގައި އިސްކޮށް އުޅުއްވި ހަސަން ލަތީފާއި، މުޙައްމަދު ޝިފާޒާއި، ހުސައިން އަމްރާއި ޢަލީ ޢާޒިމް ދާދިފަހުން ވަނީ އެމްޑީޕީއާއި ގުޅިވަޑައިގެންފައެވެ.