ޕެންޝަން ފަންޑުގެ ފައިސާ މެނޭޖްކުރަން އެހެން ބަޔަކަށް ދޭން ހުށައެޅި އިސްލާޙަކީ ހީލަތެއް ކަމަށް ހުޅުމާލޭ ދެކުނު ދާއިރާގެ މެންބަރު ޑރ. އަޙްމަދު ޝަމްޙީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި، ޑރ. ޝަމްހީދު ވިދާޅުވީ، ޕެންޝަން ގާނޫނަށް ސަރުކާރުން ހުށަހަޅާފައިވާ އިސްލާހުތަކަކީ، ޕެންޝަން ފަންޑުގައި ހުރި ރައްޔިތުންގެ ފައިސާ ސަރުކާރުން ބޭނުން ގޮތަކަށް އިންވެސްޓްކޮށް، ނުސީދާކޮށް ފައިސާ ޗާޕްކުރުމަށްޓަކައި ހަދާ މަކަރުވެރި ހީލަތެއް ކަމަށެވެ.

އެގޮތުން، ޕެންޝަން ގާނޫނުގެ 16 ވަނަ މާއްދާގެ ހ. އަށް ގެންނަ އިސްލާހަކީ ފޮރުވިފައިވާ ހީލަތެެއް ކަމަށާއި، އެ އިސްލާޙުގައި އޮތީ، ފަންޑުން އިންވެސްޓުކުރަން ވާނީ ޕެންޝަން އޮފީހުން ނުވަތަ އެސެޓު މެނޭޖަރުން މެދުވެރިކޮށް ކަމަށް ބުނެފައިވާކަމަށް ޑރ. ޝަމްހީދު ވިދާޅުވިއެވެ.

އަދި ފައިސާ މެނޭޖްކުރަން އެހެން ބަޔަކަށް ދިނުމުގެ ބޭނުމަކީ ޕެންޝަން ފަންޑުގައި ހުރި ފައިސާއަށް ސަރުކާރަށް ނުކުޅެވިގެން އެކަމަށް މަގުފަހިކުރުން ކަމަށާއި، ސަރުކާރަށް ޤާނޫނުގެ ތެރެއިން އެމަގު ކޮށިއްޖެނަމަ ފައިސާ ޗާޕްކޮށް ދިވެހި ރުފިޔާގެ އަގު ދަށްވެގެން ދާނެ ކަމަށް ވެސް އޭނާ ވިދާޅުވި އެވެ.

އޭގެއިތުރުން ޑރ. ޝަމްހީދު ވިދާޅުވީ، ސަރުކާރުން ޕެންޝަން ފަންޑު މެދުވެރިކޮށް ޗާޕް ކުރަން އުޅުނު 2.4 ބިލިއަން ރުފިޔާގެ ހީލަތް މީގެކުރިން ފެއިލްވީ ޕެންޝަން ބޯޑުގެ ބައެއް މެންބަރުންގެ ހުށިޔާރުކަމުގެ ސަބަބުން އެބޭފުޅުން މަޤާމުން އިސްތިއުފާ ދެއްވައި، ފަހުން ބޯޑަށް އައްޔަނު ކުރެއްވި ބައެއް ބޭފުޅުންވެސް އެކަމަށް ދެކޮޅު ހަދާތީ ކަމަށެވެ.

ޑރ. ޝަމްހީދު މިހެން ވިދާޅުވެފައިވާއިރު، ޕެންޝަން ޤާނޫނުގައި މިހާރު އޮތީ ޕެންޝަން އެސެޓްސް އިންވެސްޓް ކުރަންވާނީ އެގާނޫނުގައި ކަނޑައެޅިފައިވާ ގޮތުގެމަތިން، އަދި ހަމައެކަނި ސްކީމްގެ ބައިވެރިންނަށާއި ބެނިފިޝަނަރީންނަށް އެންމެ ބޮޑު ފައިދާއެއް ލިބޭނޭ ގޮތުގެ މަތިން ކަމަށެވެ.

ނަމަވެސް ސަރުކާރުން މިހާރުވަނީ، މުޅި ޕެންޝަން ސްކީމްގެ އެ މަޤްސަދު ގެއްލޭގޮތަށް އެ ޤާނޫނު އިސްލާޙު ކުރުމަށް މަޖިލީހަށް ހުށައަޅާފައެވެ.