ޢިރާޤުގެ ފެޑަރަލް ސަރަޙައްދުތަކުގައި ހުރި އަސްކަރީ މަރުކަޒުތަކުން އެމެރިކާ ސިފައިން އެކީގައި ފައިބައި، އެ ތަންތަން ޢިރާޤުގެ ސަރުކާރާ ރަސްމީކޮށް ހަވާލުކޮށްފިއެވެ.

ޢިރާޤުގެ ދިފާޢީ ވުޒާރާއިން ހާމަކުރި ގޮތުގައި، އެމެރިކާގެ އަސްކަރީ މުޝީރުންގެ އެންމެ ފަހުގެ ފައުޖު މިހާރު ވަނީ އަންބާރު ޕްރޮވިންސްގައި އޮންނަ އަލް-އަސަދު އެއާ ބޭސްއިން ފުރާފައެވެ. މިއީ ވޭތުވެދިޔަ 20 އަހަރަށްވުރެ ގިނަ ދުވަހު އެމެރިކާ ސިފައިން ބޭނުންކުރަމުން އައި މުހިންމު މަރުކަޒެކެވެ. ނަމަވެސް، އެމެރިކާގެ އަސްކަރީ ސިފައިދާ ދޫކޮށް ދިޔަ މަރުކަޒުތަކުގެ ތެރޭގައި ކުރުދިސްތާންގެ އަމިއްލަ އިދާރީ ސަރަޙައްދު ހިމެނިފައެއް ނުވެއެވެ. އެ ސަރަޙައްދުގައި އަދިވެސް އެމެރިކާގެ ބައެއް ސިފައިން ދެމިތިބޭނެއެވެ.

މި ނިންމުމަކީ 2023 ވަނަ އަހަރު ޢިރާޤު ސަރުކާރުން އެމެރިކާ ސިފައިން ފައިބައިގެން ދިޔުމަށް އެދުނު އެދުމާ ގުޅިގެން، ފާއިތުވި އަހަރުތަކުގައި ސިފައިން މަދުކުރަމުން އައި އައުމުގެ އެންމެ ފަހު މަރުޙަލާއެވެ.

އެމެރިކާއިން ޢިރާޤަށް އެންމެ ގިނައިން ސިފައިން ފޮނުވާފައިވަނީ 2003 ވަނަ އަހަރުގެ ހަނގުރާމައިގެ ދުވަސްވަރުގައެވެ. އެ ދުވަސްވަރު 170,000 ސިފައިން ޢިރާޤުގައި ތިއްބެވެ. އޭގެ ފަހުން 2011 ވަނަ އަހަރު ކުރީގެ ރައީސް ބަރަކް އޮބާމާ ސިފައިން ބޭލި ނަމަވެސް، އައިސިސްއާ ދެކޮޅަށް ކުރި ހަނގުރާމައިގައި އެހީތެރިވުމަށް 2014 ވަނަ އަހަރު އަނެއްކާވެސް 5,000 އެއްހާ ސިފައިން އެ ޤައުމަށް ފޮނުވިއެވެ. 2021 ވަނަ އަހަރުން ފެށިގެން އެމެރިކާ ސިފައިން ޢިރާޤުގައި ތިބީ ހަމައެކަނި މުޝީރުންގެ ގޮތުގައެވެ.

އެމެރިކާ ސިފައިން ޢިރާޤުން ފޭބި މި ދަނޑިވަޅަކީ ސަރަޙައްދީ މަސްރަޙު ވަރަށް ބޮޑަށް ހޫނުވެފައިވާ ވަގުތެކެވެ. ޚާއްޞަކޮށް އީރާނުގައި ކުރިއަށްދާ ސަރުކާރާ ދެކޮޅު މުޒާހަރާތަކާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް އީރާނަށް އަސްކަރީ ޙަމަލާއެއް ދިނުމާ މެދު ވިސްނަވަމުންދާ ކަމުގެ ރިޕޯޓުތައް ފެންމަތިވެ އަޑުގަދަވެފައިވާ ދުވަސްވަރެވެ. އަދި މީގެ އިތުރުން އަލް-އަސަދު އެއާ ބޭސްއަކީ ފާއިތުވި އަހަރުތަކުގައި އީރާނާއި އީރާނަށް ތާއީދުކުރާ ޖަމާޢަތްތަކުގެ ގިނަ ޙަމަލާތަކެއް އަމާޒުވެފައިވާ ތަނެއްކަން ފާހަގަކޮށްލެވެއެވެ.

ޢިރާޤުގެ ދިފާޢީ ވުޒާރާއިން ވަނީ އަލް-އަސަދު އެއާ ބޭސްގެ ހުސްވެފައިވާ އިމާރާތްތަކުގެ ތެރޭގައި އެ ޤައުމުގެ އަސްކަރީ ކޮމާންޑަރުން ހިނގާފައިދާ މަންޒަރު ފެންނަ ވީޑިއޯއެއް ވެސް އާންމުކޮށްފައެވެ. އެމެރިކާގެ ސެންޓްރަލް ކޮމާންޑުން ވެސް ވަނީ ޢިރާޤުގެ ސަރުކާރުން މި މަރުކަޒުތަކާ ހަވާލުވިކަމުގެ ޚަބަރު ކަށަވަރުކޮށްދީފައެވެ.