ރާއްޖޭގެ މަޝްހޫރު ދީނީ އިލްމްވެރިޔާ ޝެއިޚް އަބްދުލް އަޒީޒް ހުސައިން (އަޒީބެ)އަށް ސްޓްރޯކެއް ޖެހިގެން ފަރުވާދޭން ފަށައިފިއެވެ.

ޝެއިޚް އަޒީބެއަށް ސްޓްރޯކެއް ޖެހިގެން ފަރުވާދެމުން އަންނަ ކަން ހާމަކުރީ ޝެއިޚްގެ ދަރިކަލުން އަހްމަދު ކުމައިލް ފޭސްބުކްގައި ކުރެއްވި ޕޯސްޓެއްގައެވެ. އޭނާ އެޕޯސްޓުގައި ވަނީ ޝެއިޚަށް ހެޔޮ ދުއާކޮށްދިނުމަށް އެދިވަޑައިގެންފައެވެ.

ޝެއިޚް އަޒީބެއަށް ސްޓްރޯކެއް ޖެހިގެން ފަރުވާދެނީ އައިޖީއެމް ހޮސްޕިޓަލެއްގައެވެ.

ޝެއިޚް އަޒީޒްއަކީ ޒަމްޒަމް ޙައްޖު އެންޑް އުމްރާގެ ވެރިޔާ އެވެ.

އަޒީބެ އަކީ ދިވެހިރާއްޖޭގެ ދީނީ ހޭލުންތެރިކަން އިތުރުކުރުމަށާއި، އިސްލާމީ ދަޢުވަތު ފެތުރުއްވުމަށް ގިނަގުނަ ޚިދުމަތްތަކެއް ކުރައްވާފައިވާ، ދިވެހިންގެ އިޙްތިރާމާއި ލޯބި ހޯއްދަވާފައިވާ މަޝްހޫރު ދީނީ ޢިލްމުވެރިއެކެވެ. އަޒީބެއަކީ ރާއްޖޭގެ ދީނީ ޢިލްމު ފެތުރުމުގެ ދާއިރާގައި ފާހަގަކޮށްލެވޭވެސް ބޭފުޅެކެވެ. ޚާއްޞަކޮށް، ރޭޑިއޯއާއި ޓީވީ މެދުވެރިކޮށް އާންމުންނަށް ދީނީ މަޢުލޫމާތު ފޯރުކޮށްދިނުމުގައި ގިނަ އަހަރުތަކެއް ވަންދެން ޝެއިހް ޚިދުމަތް ކުރެއްވިއެވެ.

އަޒީބެ ވަނީ އިސްލާމީ ކަންތައްތަކާ ބެހޭ އެންމެ މަތީ މަޖިލީހުގެ މެންބަރުކަމާއި، ފިޤުހު އެކަޑަމީގެ މެންބަރުކަމާއި ޝަރުޢީ ދާއިރާގެ އެކި މަޤާމުތައް ފުރުއްވާފައެވެ. ދީނީ ހޭލުންތެރިކަން އިތުރުކުރުމުގެ ދާއިރާއިން ކުރެއްވި ޚިދުމަތްތަކުގެ އަގުވަޒަންކޮށް، ދިވެހި ދައުލަތުން ވަނީ އޭނާއަށް ޝަރަފުވެރިކަމުގެ ޤައުމީ އިނާމު އަރުވާފައެވެ.