ސަރުކާރުން ބޭނުންވަނީ ވީހާވެސް ގިނަ ރައްޔިތުން ލޯކަލް ކައުންސިލް އިންތިހާބުން އެކަހެރި ކުރަން ކަމަށް ޕީޕަލްސް ނޭޝަނަލް ފްރަންޓް (ޕީއެންއެފް)ގެ ނައިބު ރައީސް ޑރ. މުހައްމަދު ޖަމީލް އަހްމަދު ވިދާޅުވެެއްޖެެެއެވެ.

ލޯކަލް ކައުންސިލް އިންތިހާބާއި ގުޅިގެން ޕީއެންއެފުން އިލެކްޝަން ކޮމިޝަންގެ މެމްބަރުންނާ އެކު ބޭއްވި ބައްދަލުވުމަށް ފަހު ބޭއްވި ނޫސްވެރިންގެ ބައްދަލުވުމުގައި ކުރީގެ ނާއިބް ރައީސް ޑރ. މުހައްމަދު ޖަމީލް އަހްމަދު ވިދާޅުވީ ސަރުކާރު ހިންގާ ޕީއެންސީން ބޭނުންވަނީ ވީހާ ވެސް ގިނަ ރައްޔިތުން ލޯކަލް ކައުންސިލު އިންތިހާބުން އެކަހެރި ކުރަން ކަމަށެވެ. އެގޮތުން ހަމައެކަނި އީފާހަށް ބަރޯސާވެއްޖެ ނަމަ އެކަން އެގޮތަށް ވެގެންދާނެ ކަމަށް ޑރ. ޖަމީލް ވިދާޅުވިއެވެ. މި ސަރުކާރުން އަތޮޅު ކައުންސިލްތައް އުވާލައި ރަށު ކައުންސިލްތަކުގެ ބާރު ކަނޑުވާލާފައިވާ ކަމަށް ޑރ. ޖަމީލް ވިދާޅުވިއެވެެ.

"ކިތަންމެ ވަރަކަށް ތިމަންނަ މެންނަށް ވޯޓް ދޭށޭ ބުންޏަކަސް، އަމަލުކުރެއްވީ އަތޮޅު ކައުންސިލްތައް އުވާލީ މިއީ ޒަމާނުއްސުރެ ރާއްޖެ އުފެދިފައި އޮތް ގޮތުންނާއި އެކީގައި ރާއްޖޭގެ ރަށްތަކާއި އެތަންތަން ބެލެހެއްޓުމަށްޓަަކައި ބަލަދުވެރި ފަރާތްތައް ތިބޭ އެފަރާތަކީ އާދަމް ޝަރީފެއް ނޫން އެފަރާތަކީ ލޯކަލް ގަވަމެންޓްގައި މިހާރު ހުރި މިނިސްޓަރެއް ނޫން، އެހެންވީމާ މި އިންތިހާބުގައި މައިގަނޑު ސަރުކާރު ހިންގާ ޕީއެންސީގެ އަމާޒަކަށް ވެފައި މި އޮތީ ހަމަ މުތުލަގު ކޮށް ރާއްޖޭގެ ވީހާ ވެސް ގިނަ ރައްޔިތުން އިންތިހާބުން އެކަހެރިކުރުން ކަމަށް އަޅުގަނޑު ގަބޫލުކުރަނީ،" ޑރ.ޖަމީލް ވިދާޅުވިއެވެ.

މީގެ އިތުރުން ޑރ. ޖަމީލު ވަނީ ރައްޔިތުންގެ ބާރު ރައްޔިތުންގެ އަތަށް ނެގުމަށް މި އިންތިހާބުގައި ޕީއެންސީ ނޫން ކެންޑިޑޭޓުންނަށް ވޯޓް ނުދިނުމަށް ގޮވާލައްވާފައެވެ.

"އަަޅުގަނޑު ދަންނަވާލަން ބޭނުންވަނީ ރާއްޖޭގެ ކައުންސިލުތަކުންނާއި މި އިންތިހާބަށް ކުރިމަތިލާފައިވާ ހުރިހާ ބޭފުޅުން ނިކުމެ ވަޑައިގެން ރާއްޖޭގެ ރައްޔިތުން ކައުންސިލް އިންތިހާބަށް ވޯޓް ލާން ނިކުންނާށޭ، ނިކުމެ މި ކައުންސިލްތަކުގެ ބާރު ހޯދަން ބޭނުންވާ ކަމަށް ވާނަމަ މި އިންތިހާބުގައި ޕީއެންސީ ނޫން އެހެން ހުރިހާ ފަރާތަކަށް ވޯޓްދީ ހަގީގަތުގައި މި އިންތިހާބު ކާމިޔާބު ކޮށްދިނުމަށް މަސައްކަތް ކުރަށްވާށޭ،" ޑރ. ޖަމީލް ވިދާޅުވިއެެވެ.

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލުމަށް އެދޭ ކެނޑިޑޭޓުން ފޯމު ހުށަހެޅުމަށްޓަކައި އިލެކްޝަންސް ކޮމިޝަން (އީސީ) އިން ހުޅުވާލާފައިވާއިރު އެކަމަށް އެދި ހަމައެކަނިހުށަައެޅޭނީ އޮންލައިންކޮށް އެކަމަށް ކަނޑަައަޅާފައިވާ ޕޯޓަލުން އަމިއްލަ އީފާސް އެކައުންޓް މެދުވެރިކޮށެވެ.