މިނިއަޕޮލިސްގައި އެމެރިކާގެ ފެޑެރަލް އެޖެންޓުން ބަޑިޖަހައި އިތުރު މީހަކު މަރާލުމާ ގުޅިގެން، އެ ސިޓީގައި ބޮޑެތި މުޒާހަރާތަކެއް ފެށި، ރައީސް ޑޮނަލްޑް ޓްރަމްޕްގެ ހަރުކަށި އިމިގްރޭޝަން ސިޔާސަތުތަކާ ދެކޮޅަށް އަޑުއުފުލަން ފަށައިފިއެވެ.

ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި މިނިއަޕޮލިސްގެ ޕޮލިސް ޗީފް ބްރަޔަން އޯހާރާ ވިދާޅުވީ، ބަޑީގެ ހަމަލާތަކުގައި މަރުވެފައިވަނީ އުމުރުން 37 އަހަރުގެ ފިރިހެނެއް ކަމަށެވެ. އޭނާއަކީ މިނިއަޕޮލިސްގައި ދިރިއުޅޭ އެމެރިކާގެ ރައްޔިތެއްކަން ފާހަގަކުރައްވައި، އޯހާރާ ވަނީ ސިޓީގައި ހަރަކާތްތެރިވާ ފެޑެރަލް އެޖެންސީތަކުން އިންސާނިއްޔަތުކަމާއި އަދަބުވެރިކަމާއެކު ގާނޫނީ އިމުގެ ތެރެއިން މަސައްކަތް ކުރުމަށް ގޮވާލައްވާފައެވެ.

މި ހާދިސާ ހިނގާފައިވަނީ ރައީސް ޓްރަމްޕްގެ އަމުރަށް އެމެރިކާގެ އެކި ސަރަހައްދުތަކުގައި ފަށާފައިވާ އިމިގްރޭޝަން ކްރެކްޑައުންގެ ދަށުން، ހަތިޔާރު އެޅި ފެޑެރަލް އެޖެންޓުން މިނިއަޕޮލިސްގައި ރެއިޑްތައް ކުރިއަށްގެންދާތާ ހަފުތާތަކެއް ވެފައިވަނިކޮށެވެ. މިއީ މި މަހުގެ ތެރޭގައި އެ ސިޓީގައި ފެޑެރަލް އެޖެންޓުންގެ އަތުން މަރުވި ދެވަނަ މީހާއެވެ.

މި މަރުގެ ހަބަރާއެކު އެމެރިކާގެ އެކި ކަންކޮޅުތަކުގައި މުޒާހަރާތައް ވަނީ ވަރުގަދަވެފައެވެ. ހާހުން މީހުން މަގުތަކަށް ނުކުމެ އިންސާފަށް ގޮވާލަމުންދާއިރު، ގިނަ ބަޔަކު ދަނީ މިނިއަޕޮލިސް އިން ފެޑެރަލް އެޖެންޓުން ވަގުތުން ބޭރުކުރުމަށް ރައީސް ޓްރަމްޕަށް ބާރުއަޅަމުންނެވެ. މި ހާދިސާއާ ގުޅިގެން ސިޔާސީ މަސްރަހުވެސް ވަނީ ވަރަށް ބޮޑަށް ހޫނުވެފައެވެ.