ސާފް ފުޓްސަލް ޗެމްޕިއަންޝިޕްގެ ލީގު ބުރުގައި ރާއްޖޭން ކުޅުނު ފަހު މެޗުގައި ސްރީ ލަންކާ އަތުން 5-2 އިން މޮޅުވެ، މުބާރާތުގެ ހުރިހާ މެޗަކުން މޮޅުވެގެން ރާއްޖެއިން ސައްތަ އިން ސައްތަ ރެކޯޑަކާއެކު ޗެމްޕިއަންކަން ހޯދައިފި އެވެ.

ސާފް ފުޓްސަލް ޗެމްޕިއަންޝިޕްގެ ލީގު ބުރުގައި ރާއްޖޭން ކުޅުނު ފަހު މެޗުގައި ސްރީ ލަންކާ އަތުން 5-2 އިން މޮޅުވެ، މުބާރާތުގެ ހުރިހާ މެޗަކުން މޮޅުވެގެންނެވެ.

ރާއްޖެއިން މި މުބާރާތް ކާމިޔާބު ކުރީ ކުޅުނު ހަ މެޗުން ވެސް މޮޅުވެ 18 ޕޮއިންޓް ހޯދައިގެންނެވެ. މިއަދުގެ މެޗަށް ނުކުތްއިރު ވެސް ރާއްޖެއަށް އޮތީ މުބާރާތުގެ ތަށި ކަށަވަރުވެފަ އެވެ.

މުބާރާތުގެ ފުރަތަމަ ތިން މެޗުގައި ރާއްޖެއިން ފެނުނީ ވަރަށް ވަރުގަދަ ކުޅުމެކެވެ. އެގޮތުން ފުރަތަމަ މެޗުގައި 7-1 އިން ޕާކިސްތާން ބަލިކުރިއިރު، ދެވަނަ މެޗުގައި ބަންގްލަދޭޝް އަތުން މޮޅުވީ 6-1 އިންނެވެ. އަދި ތިންވަނަ މެޗުގައި އިންޑިއާގެ މައްޗަށް 5-0 އިން ކުރިހޯދައި ރާއްޖެއިން ވަނީ އެހެން ޓީމުތަކަށް ބޮޑު އިންޒާރެއް ދީފަ އެވެ. ނަމަވެސް، ފަހުން ކުޅުނު މެޗުތަކުގައި ނޭޕާލާއި ބޫޓާނުން ޑިފެންސިވް ކުޅުމެއް ދައްކައި ރާއްޖެއަށް އުނދަގޫތަކެއް ކުރިމަތިކުރި އެވެ. އެހެންނަމަވެސް ރާއްޖެއިން ވަނީ ނޭޕާލް އަތުން 2-1 އިން އަދި ބޫޓާން އަތުން 3-1 އިން މޮޅުވެފަ އެވެ.

ލަންކާއާ ދެކޮޅަށް މިއަދު ކުޅުނު މެޗުގައި ރާއްޖޭގެ މުހިންމު ކުޅުންތެރިޔާ ޢަބްދު ﷲ ޝާފިއު (ޝާއްޕެ) ސަސްޕެންޝަނުގައި ހުރުމުގެ ސަބަބުން އޭނާއަށް ނުކުޅެވެއެވެ. އޭނާގެ ބަދަލުގައި ޢަބްދު ﷲ ޖުނައިދު (ޖެންނޭ) ފުރަތަމަ ފަހަކުން ޖާގަ ހޯދިއިރު، ކީޕަރަކަށް ކުޅުނީ އިބްރާހިމް ނާޖިހު (ހޭޓް) އެވެ. މެޗުގެ 12 ވަނަ މިނިޓުގައި ކެޕްޓަން މުހައްމަދު އިމްރާން (އިންމި) ރާއްޖެއަށް ލީޑު ނަގައިދިން ނަމަވެސް، 17 ވަނަ މިނިޓުގައި ލަންކާގެ މުހައްމަދު ތިލްހަމް ވަނީ ނަތީޖާ އެއްވަރުކޮށްފަ އެވެ. ފުރަތަމަ ހާފު ނިމެން ކައިރިވެފައި ވަނިކޮށް ހުޒައިފަތު ރަޝީދު (ހުޒޭ) ޖެހި ލަނޑާއެކު ރާއްޖެއިން ހާފު ނިންމާލީ ކުރީގައި އޮވެގެންނެވެ.

ދެވަނަ ހާފު ފެށިގެން ހަވަނަ މިނިޓުގައި ލަންކާގެ އަމާން މުހައްމަދު ފައިޒާ އަލުން ނަތީޖާ އެއްވަރުކުރި އެވެ. ނަމަވެސް، އޭގެ ފަހުން ރާއްޖެއިން ވަނީ ކުޅުން ރަނގަޅުކޮށް ތިން ލަނޑު ޖަހާފަ އެވެ. އެގޮތުން ލަންކާގެ އާކިބް އަތުން ބައިކޮޅަށް ވަން ގޯލަކުން ރާއްޖެއަށް އަލުން ލީޑު ލިބުނުއިރު، ހުސެއިން ސުހައިލް (ސޮކޭ) އާއި ކެޕްޓަން އިންމި ވަނީ އިތުރު ދެ ލަނޑު ޖަހައިދީފަ އެވެ. މިއީ މުބާރާތުގައި އެންމެ ގިނަ ގޯލު ޖެހި ކުޅުންތެރިޔާގެ މަގާމު ހޯދި އިންމި ކާމިޔާބުކުރި ނުވަވަނަ ލަނޑެވެ. މެޗުގެ ފަހުކޮޅު ރާއްޖޭގެ ކީޕަރު ޒައިދާނަށް ރަތް ކާޑެއް ދެއްކި ނަމަވެސް، ރާއްޖެއިން ވަނީ މެޗުފެ ކޮންޓްރޯލް ނަގައި މެޗުގެ ނަތީޖާ 5 - 2 އަކަށް ދަމަހައްޓާފަ އެވެ.