މީހެއްގެ ސޯޝަލް މީޑިއާ އެކައުންޓުތައް ދަމައިގަނެ،، އޭނާގެ ހިއްސާ އޮންނަ ކުންފުނީގެ ބޭންކު އެކައުންޓުން ގިނަ އަދަދެއްގެ ފައިސާ ނަގާފައިވާ މައްސަލައެއްގެ ތުހުމަތުގައި 10 މީހަކު ހައްޔަރުކޮށްފިއެވެ.

މި މައްސަލައިގައި ހައްޔަރުކޮށްފައިވަނީ ލ. އިސްދޫ، ގުޑްލައިފް، މުހައްމަދު ހަސަން (59އ)، ސ. ހިތަދޫ، އުދަ، އަލީ އިރުފާނު އަހުމަދުދީދީ (26އ)، ސ. ހިތަދޫ، ނަންރީތިގެ، އަލީ ޝިރާޒު (38އ)، ހދ. ވައިކަރަދޫ، ޕެރިމްރޯޒް، އަބްދުﷲ ނާފިޒް (39އ)، ގއ. ކަނޑުހުޅުދޫ، ފޫހިވާގެ، މުހައްމަދު އަލީ (42އ)، މ. މާލޭގެއާގެ، މާލެ، މުހައްމަދު ނުހާދު އަލީ (30އ)، ހއ. ކެލާ، ޕެނަމާ، މުހައްމަދު ސިމާދު (38އ)، ގދ. ފިޔޯރީ، ހީނާމާގެ، އަލީ އިމްރާން (38އ) އަދި ގދ. ތިނަދޫ، ގުލްބަކާގެ، އަބްދުﷲ އިސްރާގް (19އ)، ކ. ހިންމަފުށި، މެޑޯޒް، މުޖައްމަދު އިބްރާހީމް (49އ) އެވެ.

ފުލުހުން ބުނީ މި މީހުން ހައްޔަރުކޮށްފައިވަނީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން 279،600 އަށްވުރެ ގިނަ ފައިސާ ނަގާފައިވާކަމަށް ހުށަހަޅާފައިވާ މައްސަލައާ ގުޅިގެން ހިންގި އޮޕަރޭޝަންގައި ކޯޓު އަމުރުގެ ދަށުން ކަމަށެވެ.

މީގެ ތެރެއިން އެކަކު ހިންމަފުށިން ހައްޔަރުކޮށްފައިވާއިރު، ތިން މީހަކު ހައްޔަރުކޮށްފައިވަނީ އައްޑޫ ސިޓީންކަމަށް ފުލުހުން ވަނީ ބުނެފައެވެ. ބާކީތިބި މީހުން ހައްޔަރުކޮށްފައިވަނީ މާލެއިންކަމަށް ފުލުހުން ހާމަކުރިއެވެ.

ފުލުހުން ބުނީ އެމީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުންވަނީ މުހައްމަދު އިބްރާހީމް 5 ދުވަހަށް، މުހައްމަދު އަލީ އާއި މުހައްމަދު ހަސަން 7 ދުވަހަށް، އަލީ އިރުފާން އަހުމަދުދީދީ 10 ދުވަހަށް އަދި އަނެއް ހަ މީހުން 15 ދުވަހަށް ބަންދުކުރުމަށް އަމުރުކޮށްފައިކަމަށެވެ.

ހައްޔަރުކުރި މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ފައިސާ ނަގާފައިވާ މީހުންކަމަށް ފުލުހުން ބުންޏެވެ. އަދި އެތަނުން އެކަކު، ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް އެ ފައިސާ އަށް މުދާ ގަނެފައިވާކަމަށް ފުލުހުން ބުންޏެވެ.

އަނެއް ތިން މީހުންނަކީ އެކި މީހުން އޭޓީއެމްއަށް ގެންގޮސްގެން އެ މީހުން މެދުވެރިކޮށް އޭޓީއެމްއިން ފައިސާ ނެގުމަށްފަހު އެ ފައިސާތަކާ ހަވާލުވެފައިވާ މީހުންކަމަށް ފުލުހުން ހާމަކުރިއެވެ.

ފުލުހުން ގެންދަނީ މި މައްސަލަ ތަހުގީގު ކުރަމުންނެވެ.