ސަރަހައްދީ ފުޓްސަލް ޗެމްޕިއަންކަން ހޯދި ދިވެހި ގައުމީ ފުޓްސަލް ޓީމު ރާއްޖެ އައުމުން މިރޭ ހޫނު މަރުހަބާއެއް ކިޔައިފިއެވެ.

ސަރަހައްދީ ފުޓްސަލް ތަށި ފުރަތަމަ ފަހަރަށް ކާމިޔާބުކުރި ދިވެހި ގައުމީ ފުޓްސަލް ޓީމު އެނބުރި ރާއްޖެ އައުމުން، މިރޭ ވަނީ ކުލަގަދަ ރަސްމިއްޔާތަކާއެކު އެ ޓީމަށް ހޫނު މަރުހަބާއެއް ކިޔައިފައެވެ.

ތައިލެންޑްގައި ބޭއްވި ފުރަތަމަ ސާފް ފުޓްސަލް ޗެމްޕިއަންޝިޕް ރާއްޖޭން ކާމިޔާބުކުރީ ކުޅުނު ހުރިހާ މެޗަކުން މޮޅުވެގެންނެވެ. ބޫޓާންގެ މައްޗަށް 3-1 ގެ ނަތީޖާއަކުން ކުރިހޯދައި، ރާއްޖޭން ވަނީ ސަރަހައްދީ ފުޓްސަލްގެ ރަސްކަން ކަށަވަރުކޮށްފައެވެ.

މި ފަހުރުވެރި ކާމިޔާބީއަށްފަހު ގައުމީ ޓީމު މިރޭ 19:45 ހާއިރު ރާއްޖެ އައުމުން، ވެލާނާ އިންޓަނޭޝަނަލް އެއާޕޯޓުން އެ ޓީމަށް މަރުހަބާ ދެންނެވީ ކުޅިވަރާ ބެހޭ ވަޒީރު އަބްދުﷲ ރާފިއު އާއި، އެފްއޭއެމްގެ ރައީސް އަހުމަދު ތާރިގް (ޓޮމް) ގެ އިތުރުން ކޮމިޝަނާ އޮފް ސްޕޯޓްސް މުހައްމަދު ތޮލާލެވެ.

އެއާޕޯޓުން މާލެ އައުމަށްފަހު، ކާމިޔާބީގެ އުފާ ފާޅުކުރުމުގެ ގޮތުން ޓީމުން ވަނީ ތަށްޓާއެކު ހާއްސަ ޕިކަޕު ބުރެއް ޖަހައިފައެވެ. ސޯޝަލް ސެންޓަރުން ފެށިގެން އާޓިފިޝަލް ބީޗާ ހަމައަށް ކުރިއަށްދިޔަ މި ހަރަކާތުގައި ގިނަ އަދަދެއްގެ އާންމުން ބައިވެރިވިއެވެ.

އާޓިފިޝަލް ބީޗުގައި ބޭއްވި ހާއްސަ ރަސްމިއްޔާތުގައި ގައުމީ ޓީމާއެކު ފޮޓޯ ނެގުމުގެ ފުރުސަތު އާންމުންނަށް ހުޅުވާލިއިރު، މި ހަރަކާތް ނިންމާލާފައިވަނީ ކުލަގަދަ ހަވާއެރުވުމުގެ ރަސްމިއްޔާތަކުންނެވެ.

ދިވެހި ޤައުމީ ފުޓްސަލް ޓީމުގެ ކާމިޔާބީ ފާހަގަކުރެއްވުމުގެ ގޮތުން، އެ ޓީމަށް 1 މިލިއަން ރުފިޔާގެ ފައިސާގެ އިނާމެއް ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ.