މެލޭޝިއާގެ ޕޭރަކްއަށް ނިސްބަތްވާ އުމުރުން 46 އަހަރުގެ ލޮރީ ޑްރައިވަރަކު، އޭނާގެ ފުރަތަމަ އަނބިމީހާއަށް ސިއްރުން އިންޑޮނޭޝިއާގައި ހުރި މާބަނޑު ދެވަނަ އަނބިމީހާ ގާތަށް ގޮސް އެނބުރި އައި މަގުމަތީގައި ކަމާބެހޭ ފަރާތްތަކުން ހައްޔަރުކޮށްފިއެވެ.

އިންޑޮނޭޝިއާގެ ތަންޖުންގް ބާލާއީން ފުރައިގެން ޣައިރު ގާނޫނީ މަގަކުން އެނބުރި މެލޭޝިއާއަށް އެތެރެވާން އުޅެނިކޮށް އޭނާ ހައްޔަރުކުރީ، ގާނޫނީ އިޖުރާއަތްތަކާ ޚިލާފަށް ދަތުރުކުރުމުގެ ސަބަބުންނެވެ.

އޮފިސަރުންނަށް މައުލޫމާތު ދެމުން އެ މީހާ ކިޔައިދިން ގޮތުގައި، އޭނާގެ ދެވަނަ އަނބިމީހާ ބަލިވެއިނދެ، ހާލު ސީރިއަސްވުމުން އިންޑޮނޭޝިއާގެ މެޑާންއަށް ދާން އޭނާ ބޭނުންވިއެވެ. ނަމަވެސް، އޭނާ ދެވަނަ ކައިވެންޏެއް ކޮށްގެން އުޅޭކަން ފުރަތަމަ އަނބިމީހާއަށް ސިއްރުކޮށްފައި އޮތުމާއި، އޭނާގެ ޕާސްޕޯޓް ފުރަތަމަ އަނބިމީހާ ހިފަހައްޓާފައި އޮތުމުގެ ސަބަބުން ވައިގެ މަގުން ދަތުރުކުރެވޭނެ ގޮތެއް ނެތެވެ. އެހެންކަމުން އަނބިމީހާއަށް ފިލައިގެން ކަނޑުމަގުން ވަގަށް ދަތުރުކުރަން ނިންމީ ކަމަށް އޭނާ އިއުތިރާފުވިއެވެ.

މިއީ އޭނާ ގާނޫނާ ޚިލާފަށް ދަތުރުކުރި ފުރަތަމަ ފަހަރު ކަމުގައިވީނަމަވެސް މި ހާދިސާގެ ސަބަބުން އޭނާއަށް މިހާރު ވަނީ ގާނޫނީ ބޮޑެތި މައްސަލަތަކަކާ ކުރިމަތިލާން ޖެހިފައެވެ. އާއިލީ ސިއްރު ހިފެހެއްޓުމަށްޓަކައި ކުރި މި ނުރައްކާތެރި ދަތުރު ނިމުނީ، އޭނާގެ ދެވަނަ ކައިވެނީގެ ޚަބަރު ފަޅާއަރައި، ފުރަތަމަ ކައިވެންޏަށް ލޮޅުންއަރައި އަދި ފުލުހުންގެ ބެލުމުގެ ދަށަށްދާންޖެހިއެވެ.