ވެރިކަމަކީ އަމާނާތެއްކަމަށާއި، މޮޅުވުމަކީ އެހެން މީހުންނާ ވާދައަށް ކަންކަން ކުރުމުގެ ބަދަލުގައި އަމިއްލަ ނަފްސާ ވާދަކޮށް އިޞްލާޙުވުން ކަމަށް ކުރީގެ މަޖިލިސް މެންބަރު އަދި ސިޔާސީ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ނަފާ ނަސީމް ވިދާޅުވެއްޖެއެވެ.

ނަސީމް މިހެން ވިދާޅުވީ، މީސްމީޑިއާގައި ޙިއްސާ ކުރެއްވި މެސެޖެއްގައެވެ. ނަސީމްގެ މެސެޖުގައި ވިދާޅުވެފައިވަނީ، ވެރިކަމަކީ އަމާނާތެއް ކަމަށާއި، އެއީ ވަކި މީހެއްގެ ނުވަތަ ބައެއްގެ "ލެގަސީ" އެއް ނޫންކަމަށެވެ. އަދި އެއީ އެކަކު އަނެކަކަށް ވާދަވެރިކަން ދައްކަން އޮތް ވަސީލަތެއް ނޫންކަމަށްވެސް އޭނާ ވިދާޅުވިއެވެ.

ނަސީމްގެ ވިދާޅުވެފައިވަނީ، މޮޅުވުމަކީ އެހެން މީހުންނާ ވާދައަށް "ގަޅި" ކަންކަން ކުރުން ނޫން ކަމަށެވެ. އޭގެ ބަދަލުގައި، ހަގީގީ މޮޅުވުމަކީ އަމިއްލަ ނަފްސާ ވާދަކުރުން ކަމަށް އޭނާ ވިދާޅުވިއެވެ.

"މޮޅުވުމަކީ އަމިއްލަ ނަފްސާ ވާދަކުރުމެވެ. ކުރިން ތިމާ ކުރި ކަންތަކަށް ވުރެ މޮޅަށް، ރަނގަޅަށް ކަންކުރުމެވެ،" ނަސީމް ވިދާޅުވެފައިވެއެވެ.

ހަމައެއާއެކު ސިޔާސީ ދާއިރާގައި ހަރަކާތްތެރިވާ ފަރާތްތަކުންނާއި ދައުލަތުގެ މުއައްސަސާތަކުގެ އިސް މަގާމުތަކުގައި ތިއްބަވާ ބޭފުޅުން، ޒާތީ ވާދަވެރިކަމުގެ ބަދަލުގައި ރައްޔިތުންނަށް ފެންވަރު ރަނގަޅު ޚިދުމަތެއް ދިނުމަށް އިސްކަންދިނުމަށް ނަސީމް ވަނީ ގޮވާލައްވާފައެވެ.

ނަސީމް މިހެން ވިދާޅުވެފައިވާއިރު، ރާއްޖޭގެ މިހާރުގެ ސިޔާސީ މަސްރަޙުގައި އެއްބަޔަކު ކޮށްފައިވާ ބުރަ މަސައްކަތުގެ ރީތިނަން ލިބިގަތުމަށް އަނެއްބަޔަކު މަސައްކަތް ކުރުމުގެ ނުރަނގަޅު ސިފަ ވަރަށް ބޮޑަށް އަށަގަންނަމުން ދާކަމަށް މީސްމީޑިއާގައި ޢާއްމުން ދަނީ ބުނަމުންނެވެ.