ސަރަހައްދީ ފުޓްސަލްގެ ރަސްކަން ހޯދައި، ކުޅުނު ހުރިހާ މެޗަކުން ބޮޑު ތަފާތަކުން މޮޅުވެ ގައުމަށް ރީތި ނަން ހޯދައިދިން ފުޓްސަލް ޓީމު ރާއްޖެ އައުމުން، އެ ކުޅުންތެރިންނަށް މަރުހަބާ ކިޔުމަށް ނުކުތް މީހުންގެ އަދަދު މަދުވުމުން ގިނަ ބައެއްގެ ފާޑުކިޔުން އަމާޒުވެއްޖެއެވެ. ގައުމީ ބަތަލުންނަށް ހައްގުވާ ޝަރަފާއި އިހުތިރާމް އަދާކުރުމުގެ ބަދަލުގައި، މިއަދު ދިވެހީންގެ އިސްކަން ސިޔާސީ ހަރަކާތްތަކަށް ބަދަލުވެފައިވާކަން މިވަނީ ހާމަވެފައެވެ.

ފާއިތުވި ހައެއްކަ މަސްދުވަހުގެ ތެރޭގައި ތަފާތު ތިން ސިޔާސީ ޕާޓީއަކުން އާޓިފިޝަލް ބީޗުގައި ބޭއްވި ހަރަކާތްތަކަށް ބަލާއިރު، އެ ތަނުގައި ފައި ޖައްސާލާނެ ތަންފުކެއް ނެތް މިންވަރަށް މީހުން އެއްވިކަން ފާހަގަކުރެވެއެވެ. ނަމަވެސް، މުޅި ގައުމަށް ފަހުރުވެރި ކާމިޔާބީއެއް ހޯދައިދިން ޓީމަށް މަރުހަބާ ކިޔުމަށް އެއްވީ އެންމެ 1000 އެއްހާ މީހުން ކަމަށްވުމީ، ގައުމީ ލޯތްބަށްވުރެ ސިޔާސީ ވާދަވެރިކަން އިސްވެފައިވާ މިންވަރު ހާމަވެގެންދާ ހެއްކެކެވެ.

މިކަމާ ގުޅިގެން ގިނަ ބަޔަކު ބުނަމުންދަނީ، ގައުމީ ބަތަލުން ކުރި ބުރަ މަސައްކަތުގެ އަގު ވަޒަންކުރަން ދިވެހީން މިއަދު ބޭނުން ނުވާކަމަށެވެ. ތިމާމެންގެ ފަޚުރު ވެރި ގައުމުގެ ޝަރަފަށްވުރެ ޕާޓީގެ ކަންކަމަށް އޮތް ފޯރިގަދަވެ އެކަންކަން މުހިންމުވެފައިވުމަކީ މި ދިވެހި މުޖުތަމައު ސިޔާސީ އޮއިވަރުގައި ޖެހިފައިވާ މިންވަރު ވަރަށް ރަގަޅަށް ހާމަވާ ކަމެކެވެ.

ދިވެހިންގެ ޤައުމީ ރުޙާއި ޤައުމީ އެއްބައިވަންތަކަން މިހާ ދަށުދަރަޖައަށް ވެއްޓިގެން ދިޔުމަކީ ވަރަށްވެސް ހިތާމަވެރި ކަމެކެވެ. ގައުމީ ޓީމުން އެ ހޯދައިދިން ފާޚްރާއި ޝަރަފުގެ އަގު ވަޒަންކުރުމުގައި ދިވެހީންގެ ކިބައިން ފެނިގެން ދިޔަ ފަރުވާކުޑަކަމަކީ ޤައުމަށް ހެޔޮއެދޭ އަދި ޤައުމީ ލޯބި ހިތުތެރޭ އޮތް ދިވެހި ކޮންމެ ދަރިއަކުވެސް ލަދުގަންނަންޖެހޭވަރުގެ ކަމެކެވެ.