ޔުނިވަރސިޓީ އޮފް ޕެންސިލްވޭނިއާގެ ދިރާސާވެރިން ވަނީ ކުޅުގައި ހުންނަ ބައެއް ކަހަލަ ވައިރަސްތައް 95 އިންސައްތަ އަށް ވުރެ ބޮޑަށް ނައްތާލައި، ބަލި ފެތުރުން ހުއްޓުވުމަށް އެހީތެރިވެދޭ އާދަޔާ ހިލާފު "އެންޓިވައިރަލް" ޗުުއިންގަމެއް އުފައްދާފައެވެ. ގަސްގަހާގެހިން ތައްޔާރުކޮށްފައިވާ މި ޗުއިންގަމަކީ ބަލިމަޑުކަން ފެތުރުން ކުޑަކުރުމަށް ބޭނުންކުރެވިދާނެ ފަސޭހަ އަދި ރައްކާތެރި ވަސީލަތެކެވެ.

ޕެން ސްކޫލް އޮފް ޑެންޓަލް މެޑިސިންގެ ހެންރީ ޑެނިއަލްގެ އިރުޝާދުގެ ދަށުން އުފެއްދި މި ޗުއިންގަމުގައި ބޭނުންކޮށްފައިވަނީ "ލެބްލެބް ބީންސް" ނުވަތަ ހަޔަސިންތު ބީންސް އިން ނަގާފައިވާ "ފްރިލް" ނަމަކަށް ކިޔާ ޕްރޮޓީނެކެވެ. މި ޕްރޮޓީނަކީ ވައިރަސްތަކުގެ ބޭރު ފަށަލައިގައި ހުންނަ ހަކުރުގެ މޮލިކިއުލްތަކުގައި ހިފަހައްޓައި، ވައިރަސްތައް ހަށިގަނޑުގެ ސެލްތަކަށް ވަނުމާއި އިތުރުވުން ހުއްޓުވައިދޭ "ދަންތުރައެއް" ފަދަ އެއްޗެކެވެ.

މި ދިރާސާ ކުރިއަށް ގެންގޮސްފައިވަނީ މީގެ ކުރިން ކޮވިޑް-19 އާ ދެކޮޅަށް އުފެއްދި ޗުއިންގަމަށް ބިނާކޮށެވެ. އައު ހޯދުންތަކުން ދައްކާ ގޮތުގައި، 2 ގްރާމްގެ ޗުއިންގަމެއްގައި ހިމެނޭ އެންމެ 40 މިލިގްރާމްގެ ބީން ޕައުޑަރުން ވެސް އިންފްލުއެންޒާ އޭ އަދި އާއި ހާޕީޒް ވައިރަސް ގެ މިންވަރު 95 އިންސައްތަ އަށް ވުރެ ބޮޑަށް ދަށްކޮށްދެއެވެ. ޗުއިންގަމް ހަފަމުންދާއިރު މި ޕްރޮޓީންތައް ކުޅުގެ ތެރެއަށް ދޫވެ، ވާހަކަދެއްކުމާއި، ކެއްސުމާއި، ނުވަތަ ކިނބިހިއެޅުމުގެ ތެރެއިން ވައިރަސް ފެތުރުން ވަގުތުން ހުއްޓުވައިދެއެވެ.

މި އުފެއްދުމަކީ އާންމު ހޫނުމިނުގައި 790 ދުވަހަށް ވުރެ ގިނަ ދުވަހު ހަލާކުނުވެ ހުންނަ، އެފް.ޑީ.އޭ ގެ މިންގަނޑުތަކަށް ފެތޭ ރައްކާތެރި އެއްޗެކެވެ. ދިރާސާވެރިން މިހާރު ދަނީ މި ޓެކްނޮލޮޖީ ބޭނުންކޮށްގެން ދޫނި ރޯގާ ފަދަ ބަލިތައް ކޮންޓްރޯލް ކުރުމަށް ވެސް މަސައްކަތް ކުރަމުންނެވެ. ކްލިނިކަލް ޓްރަޔަލްތަކުން މިއީ ކާމިޔާބު އެއްޗެއްކަން ސާބިތުވެއްޖެނަމަ، ސްކޫލްތަކާއި، ބަސް ހުއްޓިތަކާއި، އަދި ހޮސްޕިޓަލްތައް ފަދަ މީހުން ގިނަ ތަންތަނުގައި ބަލި ފެތުރުން ހުއްޓުވުމަށް މިއީ ވަރަށް އަގުހެޔޮ އަދި ފަސޭހަ ހައްލަކަށް ވާނެއެވެ.