މިއަދު ރާއްޖޭގައި ހިމާޔަތް ލިބެނީ ވައްކަންކުރާ މީހުންނަށް ކަމަށް ކުރީގެ ރައީސް ޔާމީން އަބްދުލްޤައްޔޫމު ވިދާޅުވެއްޖެއެވެ.

ޕީއެންއެފް އިން ރޭ ބޭއްވި ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ، ރާއްޖޭގެ ކޮންމެ ތަނަކުން ވެސް ފެންނަނީ ވައްކަން ކުރާ މަންޒަރު ކަމަށެވެ. އެގޮތުން ބިންކޮޅެއް ނުވަތަ ވެލިކޮޅެއް ފެންނަން އޮތްނަމަ އެއިން ވައްކަން ކުރަމުންދާ ކަމަށާއި، އެއީ ރާއްޖޭގެ މިއަދުގެ ހިތާމަވެރި ހާލަތު ކަމަށް ރައީސް ޔާމީން ވިދާޅުވިއެވެ.

ރާއްޖޭގެ ޖިނާއީ އަދުލުގެ ނިޒާމު އޮތް ގޮތާމެދު ކަންބޮޑުވުން ފާޅުކުރަމުން ރައީސް ޔާމީން ވިދާޅުވީ އެ ނިޒާމުގެ ކަންކަން ހިނގަމުންދާ ގޮތުން ލަދުވެތިވެ ވަޑައިގަންނަވާ ކަމަށެވެ. އެގޮތުން އެމްއެމްޕީއާރްސީގެ ބޮޑު ވައްކަމަށް އިޝާރާތް ކުރައްވައި ރައީސް ޔާމީން ވަނީ އެ ހިޔާނާތައް އެއްބަސްވި މީހުންނަށް އަދަބު ނުދީ މާފުކޮށްފައިވާތީ އެކަމާ ސުވާލު އުފައްދާފައެވެ.

ހަމައެއާއެކު ރައީސް ޔާމީން ވިދާޅުވީ، ރާއްޖޭގައި ވައްކަން ކުރާނަމަ ކުރަންވީ ބޮޑެތި އަދަދުތަކުން ކަމަށާއި، އެފަދަ ބޮޑެތި ކުށްތައް ކުރާ މީހުންނަށް އިއްވާ ހުކުމްތައް ތަންފީޒު ނުކުރެވޭ ކަމަށެވެ. އަދި ބޮޑެތި ވައްކަން ކުރާ މީހުން ތިން ދުވަސް ތެރޭގައި ޖަލުން ނިކުންނައިރު، ކުދި ވައްކަން ކުރާ މީހުން ހުކުމް އެއްކޮށް ތަންފީޒު ކުރަން ޖެހުމަކީ އިންސާފެއް ނޫން ކަމަށްވެސް އެމަނިކުފާނު ވަނީ ވިދާޅުވެފައެވެ.

ރާއްޖޭގެ ޖިނާއީ ނިޒާމަކީ ވެސް ކޮރަޕްޝަންގެ ތެރެއަށް ގޮސްފައިވާ ނިޒާމެއްގެ ގޮތުގައި ސިފަކުރައްވަމުން ރައީސް ޔާމީން ވިދާޅުވީ، މިއަދު ރާއްޖޭގައި ހިމާޔަތް ލިބެނީ ވެސް ވައްކަން ކުރާ މީހުންނަށް ކަމަށެވެ. އަދި ރައްޔިތުން އިހްތިރާމްވެސް ކުރަނީ ވައްކަން ކުރާ މީހުންނަށް ކަމަށް ރައީސް ޔާމީން ވަނީ މި ޖަލްސާގައި ވިދާޅުވެފައެވެ.