މާލޭގެ ރައްޔިތުންނަށް "ލިބިފައި އޮތް އެއްޗެއް، ލިބިފައި އޮތް ތަނަކުން، ލިބިފައި އޮތް ގޮތަކަށް" ދެއްވާނެ ކަމުގެ ފޮނި ވައުދުތަކާއެކު ވެރިކަމަށް ވަޑައިގެންނެވި ރައީސް މުއިއްޒުގެ ސަރުކާރަށް ދެ އަހަރު ވެގެން ދިޔައިރު، ފެންނަމުންދަނީ ރައްޔިތުންގެ އުއްމީދުތަކުގައި ކޮޅުފައިން ޖަހަމުންދާ މަންޒަރެވެ.

ރިޔާސީ އިންތިހާބާއި މަޖިލިސް އިންތިހާބުގެ މެޖޯރިޓީ ހޯއްދެވުމަށް "ބޯހިޔާވަހިކަމުގެ" ނާޖާއިޒު ފައިދާ ނަންގަވައި، މާލޭގެ ރަށްވެހިންގެ އިހްސާސްތަކާ ކުޅުއްވުމަށްފަހު، މިއަދު ފެންނަނީ އެމްޑީޕީ ސަރުކާރުން ހަވާލުކުރި ގޯތިތަކާއި ފްލެޓްތަކުގެ ރަޖިސްޓްރީތަކާއި އެއްބަސްވުންތައް ބާތިލުކުރަމުންދާ ހިތްދަތި މަންޒަރެވެ.

ސަރުކާރުގެ ނުފޫޒުން ފަހި ދިރިއުޅުން ކޯޕަރޭޝަން (އެފްޑީސީ) މެދުވެރިކޮށް 'ގެދޮރުވެރިޔާ' ސްކީމްގެ ދަށުން ފްލެޓް ލިބުނު 400 އެއްހާ އާއިލާގެ އެއްބަސްވުންތައް ބާތިލުކުރަން ފެށުމަކީ ރައްޔިތުންގެ ބޯހިޔާވަހިކަމުގެ ހައްގަށް އަރައިގަތުމުގެ ބޮޑު ޖަރީމާއެކެވެ.

މީގެ އިތުރުން، ހުޅުމާލެ ފޭސް 3 ގެ ލޭންޑް ޔޫސް ޕްލޭނަށް ބަދަލު ގެނެސް، ދައުލަތުގެ ނިޝާނާއި ސިއްކަ ޖަހާފައިވާ ގޯތިތަކުގެ ރަޖިސްޓްރީތައް ބާތިލުކުރަން ނިންމި ނިންމުމަކީ ގާނޫނީ ގޮތުން ވެސް ބޮޑެތި ސުވާލުތަކެއް އުފެދޭ ކަމެކެވެ. ގާނޫނީ ވަކީލުން ފާހަގަކުރާ ގޮތުގައި، ސަރުކާރު ބަދަލުވުމަކީ ދައުލަތުން ރައްޔިތުންނަށް ދީފައިވާ ގާނޫނީ ލިޔެކިޔުންތައް ހިތުހުރި ގޮތަކަށް ބަދަލުކުރަން ލިބޭ ލައިސަންސެއް ނޫނެވެ.

މި ސަރުކާރުން ބޯހިޔާވަހިކަމުގެ މަޝްރޫއުތައް ފަސްކުރަމުންދަނީ ސިޔާސީ ބޭނުމަކަށްޓަކައި، ކުރިއަށް އޮތް އިންތިހާބުތަކާ ދިމާކޮށް އެތަންތަން "ސިޔާސީ ހަދިޔާ" އެއްގެ ގޮތުގައި ބަހާލުމަށް ކަމަށް ގިނަ ބަޔަކު ތުހުމަތުކުރެއެވެ. ސަތޭކަ ބިލިއަނަށް ވުރެ ބޮޑު ބަޖެޓެއް ދިރުވާލިއިރު، ތަރައްގީގެ އެއްވެސް އާ މަޝްރޫއެއް ނުހިނގާ ތަނުގައި، ކުރީ ސަރުކާރުން ނިންމާފައި ހުރި ފްލެޓްތައް ވެސް ހައްގުވެރިންނަށް ހަވާލުނުކޮށް ރައްޔިތުން ގަނަ ތަޅުވަނީއެވެ. މިއީ އިހްލާސްތެރިކަމެއް ނެތް، ހަމައެކަނި އަމިއްލަ ސިޔާސީ މަންފާއަށްޓަކައި ރައްޔިތުންގެ ވިންދާ ކުޅެމުންދާ ވެރިކަމެއްގެ ސިފައެވެ.