ބުރުކީނާ ފާސޯގެ ޒައީމް ކެޕްޓަން އިބްރާހީމް ތަރައުރޭ، އީރާނަށް އަސްކަރީ އެހީތެރިކަން ފޯރުކޮށްދިނުމަށް ތައްޔާރަށް ހުންނެވި ކަމަށް ވިދާޅުވެ، ހުޅަނގުގެ ބާރުތަކަށް ވަރުގަދަ އިންޒާރެއް ދެއްވައިފިއެވެ. ތަރައުރޭ ވިދާޅުވި ގޮތުގައި، އީރާނުން އެދިއްޖެ ނަމަ ބުރުކީނާ ފާސޯގެ އަސްކަރިއްޔާ އޮތީ އެ ގައުމުގެ ދިފާއުގައި ނުކުތުމަށް ތައްޔާރަށެވެ.

މީގެ އިތުރުން، އެމެރިކާ ފަދަ ބޮޑެތި ބާރުތަކުން ދުނިޔޭގެ އެކި ކަންކޮޅުތަކުގައި އެއްވެސް ޖެހިލުމެއް ނެތި، އަމިއްލަ ބޭނުމަށް ކުރަމުންދާ ކަންކަމުގެ ވަގުތު މިހާރު ފާއިތުވެފައިވާ ކަމަށާއި، އެމެރިކާގެ ނުފޫޒު ހިނގި ދުވަސްތައް މިހާރު ނިމުމަކަށް އައިސްފައިވާ ކަމަށްވެސް އޭނާ ފާހަގަކުރެއްވިއެވެ.

މި ބަޔާނަކީ ދާދި ފަހުން ބުރުކީނާ ފާސޯ އާއި އީރާނާ ދެމެދު އުފެދެމުންދާ ގާތް ގުޅުމުގެ ތެރެއިން އައިސްފައިވާ ވާހަކައެކެވެ. ދާދި ފަހުން ބުރުކީނާ ފާސޯގެ ޑިފެންސް މިނިސްޓަރު އީރާނަށް ކުރެއްވި ދަތުރުފުޅުގައި، ދެ ގައުމުގެ ދެމެދުގައި އަސްކަރީ އަދި އިގްތިސާދީ ގުޅުން ބަދަހިކުރުމާ ބެހޭގޮތުން ވަނީ މަޝްވަރާކޮށްފައެވެ.

ފްރާންސާއި އެމެރިކާގެ އަސްކަރީ ނުފޫޒުން ބޭރުވެ، އަމިއްލަ ސިޔާދަތު ރައްކާތެރިކުރުމަށް މަސައްކަތް ކުރަމުންދާ ދަނޑިވަޅެއްގައި، ތަރައުރޭގެ މި ވާހަކަތަކަކީ ބައިނަލްއަގުވާމީ ސިޔާސީ މަސްރަހަށް އަންނަމުންދާ ބޮޑު ބަދަލެއްގެ ނިޝާނެއް ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.