އާންމު އިޖުތިމާއީ މިންގަނޑުތަކާ ހިލާފަށް، ރަށު ތެރޭގައި ބިކިނީ ލައިގެންނާއި ނިވައިކަން ކުޑަ ހެދުން އަޅައިގެން އުޅޭ ފަތުރުވެރިން ޖޫރިމަނާކުރަން ބ. ފުޅަދޫ ކައުންސިލުން ނިންމައިފިއެވެ.

ފުޅަދޫ ކައުންސިލުން މިއަދު ނެރުނު އިއުލާނެއްގައި ބުނެފައިވަނީ، ރަށުގެ އާންމު ތަންތަނުގައި ފަތުރުވެރިން ހެދުން އަޅާ ގޮތާ މެދު އާންމުންގެ ޝަކުވާ ތަކުރާރުކޮށް ލިބެމުންދާ ކަމަށެވެ. މި މައްސަލަ ހައްލުކުރުމަށް ކައުންސިލުން މީގެ ކުރިން އެކި ފަހަރުމަތިން ގިނަ މަސައްކަތްތަކެއް ކުރި ނަމަވެސް، އެދެވޭ ހައްލެއް ލިބިފައިނުވާ ކަމަށް އެ ކައުންސިލުން ފާހަގަކުރެއެވެ.

އެހެންކަމުން، ރަށުގެ އިޖުތިމާއީ މިންގަނޑުތައް ހިފެހެއްޓުމުގެ ގޮތުން، މިއަދުން ފެށިގެން އާންމު ތަންތަނުގައި ބިކިނީ ނުވަތަ ނިވައިކަން ކުޑަ ހެދުން އަޅައިގެން އުޅޭ ކޮންމެ ފަތުރުވެރިއަކު 750 ރުފިޔާއިން ޖޫރިމަނާކުރަން ކައުންސިލުން ވަނީ ނިންމާފައެވެ.

އާބާދީގައި ގާތްގަނޑަކަށް 300 އެއްހާ މީހުން ދިރިއުޅޭ ފުޅަދޫ ކައުންސިލުން މިފަދަ ފިޔަވަޅެއް އަޅާފައި މިވަނީ، ރާއްޖޭގެ މީހުން ދިރިއުޅޭ ރަށްރަށުގެ އާންމު ތަންތަނުގައި ފަތުރުވެރިން ބިކިނީ ލައިގެން އުޅޭ މައްސަލަ ހައްލުކޮށްދިނުމަށް އެދި ރައްޔިތުންގެ މަޖިލީހަށް ވެސް ޕެޓިޝަނެއް ހުށަހަޅާފައިވާ ދަނޑިވަޅެއްގައެވެ.

ލޯކަލް ޓޫރިޒަމް ފުޅާވަމުން އަންނަ ރަށްރަށުގައި ފަތުރުވެރިންނަށް ހާއްސަ ބީޗުތަކާއި ސަރަހައްދުތައް ކަނޑައަޅާފައި އޮތް ނަމަވެސް، ރަށު ތެރޭގައާއި އާންމު ތަންތަނުގައި އިސްލާމީ އަދި އިޖުތިމާއީ މިންގަނޑުތަކާ ހިލާފަށް ފަތުރުވެރިން އުޅޭ މައްސަލައަކީ ގިނަ ރަށްރަށުގެ ރައްޔިތުންގެ ބޮޑު ކަންބޮޑުވުމެކެވެ.

ފުޅަދޫ ކައުންސިލްގެ މި ނިންމުމަކީ ރަށުގެ ސަގާފަތާއި އާދަކާދަ ހިމާޔަތްކުރުމަށް އެޅުނު މުހިންމު ފިޔަވަޅެއްގެ ގޮތުގައި އެރަށު ކައުންސިލުން ދެކެއެވެ.