އެމެރިކާގެ ސެނެޓްގެ ކޮމިޓީއަކުން ބޭއްވި އަޑުއެހުމެއްގެ ތެރެއިން، އެމެރިކާގެ މެރިންސްގެ ކުރީގެ ސިފައިގެ މީހެއް ކަމަށްވާ ބްރަޔަން މެކްގިނިސް، އެމެރިކާ އާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައާ ދެކޮޅަށް އަޑުއުފުލައި އިހުތިޖާޖުކޮށްފިއެވެ.

ބުދަ ދުވަހު އޮތް ސެނެޓް އާމްޑް ސާވިސަސް ސަބްކޮމިޓީގެ ބައްދަލުވުމުގައި، އަސްކަރީ ޔުނީފޯމުގައި ހުރި މެކްގިނިސް ވަނީ "އިޒްރޭލަށްޓަކައި މި ހަނގުރާމަ ކުރާކަށް އެމެރިކާ ބޭނުމެއް ނުވޭ" ކަމަށް ބާރަށް ގޮވާލައި، މަޝްވަރާތައް މެދުކަނޑާލާފައެވެ. އޭނާ އިތުރަށް ބުނެފައިވަނީ އެމެރިކާގެ ދަރިން އިޒްރޭލުގެ މަސްލަހަތަށްޓަކައި ހަނގުރާމައަށް ފޮނުވަން އެމެރިކާގެ ރައްޔިތުން ބޭނުންނުވާ ކަމަށެވެ.

​މި ހާދިސާ ހިނގާފައިވަނީ ކޮމިޓީގެ އަޑުއެހުން ފެށުނުތާ ގާތްގަނޑަކަށް 30 މިނެޓް ފަހުންނެވެ. މެކްގިނިސް އަޑުގަދަކުރަން ފެށުމުން، ކެޕިޓަލް ޕޮލިހުން ވަނީ އޭނާ އެ ތަނުން ނެރުމަށް މަސައްކަތްކޮށްފައެވެ. މި ކުރިމަތިލުމުގެ ތެރޭގައި ސެނެޓަރު ޓިމް ޝީހީ ވެސް ވަނީ ފުލުހުންނަށް އެހީތެރިވެ، މެކްގިނިސް ގަދަކަމުން ކޮޓަރިން ބޭރުކޮށްފައެވެ.

މެކްގިނިސް އާއި އޭނާގެ ކެމްޕޭން ޓީމުން ބުނާ ގޮތުގައި، ފުލުހުންނާއި ސެނެޓަރު އޭނާ ނެރުމަށް މަސައްކަތް ކުރި ވަގުތު އޭނާގެ އަތް ވަނީ ބިންދައިގެން ގޮސްފައެވެ. ނަމަވެސް ފުލުހުން ބުނެފައިވަނީ އޭނާ ހައްޔަރުކުރަން އުޅުމުން ގަދަދެއްކުމުގެ ސަބަބުން އަނިޔާވީ ކަމަށެވެ.

​ނޯތު ކެރޮލައިނާގެ ސެނެޓް ގޮނޑިއަށް ގްރީން ޕާޓީގެ ފަރާތުން ވާދަކުރާ މެކްގިނިސް ވަނީ، މި ހަނގުރާމައަކީ އެމެރިކާގެ ވެރިން ރައްޔިތުންނަށް ވީ ހިޔާނާތެއްގެ ގޮތުގައި ސިފަކޮށްފައެވެ.

އޭނާ ބުނި ގޮތުގައި އެމެރިކާގެ ސަރުކާރުން ބައިނަލްއަގުވާމީ ގާނޫނުތަކާ ހިލާފަށް އީރާނަށް ހަމަލާދީ، އިޒްރޭލުގެ މަސްލަހަތު ކުރިއަރުވަން މަސައްކަތް ކުރަމުންދާ ދިއުމަކީ ބަލައިގަނެވޭނެ ކަމެއް ނޫނެވެ. މި ހާދިސާއާ ގުޅިގެން މެކްގިނިސްގެ މައްޗަށް ފުލުހުންނަށް ހަމަލާދިނުމާއި، ހައްޔަރުކުރުމަށް ހުރަސްއެޅުމުގެ ދައުވާ ވަނީ އުފުލާފައެވެ.