މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ މަސައްކަތްތައް ހަރުދަނާކުރުމަށްޓަކައި ގާއިމުކުރާ "ގައުމީ ސިއްހީ ލެބޯޓަރީ" އަކީ ސިއްހީ ދާއިރާއަށް އަންނާނެ މުހިންމު ބޮޑު ބަދަލެއް ކަމަށް ސިއްހީ ވަޒީރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، މި އަހަރާއި އަންނަ އަހަރުގެ ތެރޭގައި އެމްއެފްޑީއޭއަށް ގެނެވޭނެ އެންމެ ބޮޑު ކުރިއެރުމަކީ މި ލެބޯޓަރީ ގާއިމުކުރުން ކަމަށެވެ.

މިހާރު ގައުމީ ސިއްހީ ލެބޯޓަރީ ހިންގަމުންދަނީ ސިއްހީ ވުޒާރާ ހުންނަ އިމާރާތުގައި ކަމަށްވާއިރު، އެތަނަކީ ޖާގައިގެ ގޮތުންނާއި ވަސީލަތްތަކުގެ ގޮތުން އެކަށީގެންވާ ތަނެއް ނޫންކަން ވަޒީރު ފާހަގަކުރެއްވިއެވެ. މި ގޮންޖެހުންތަކަށް ހައްލު ހޯދުމަށްޓަކައި ހުޅުމާލެއިން 26،000 އަކަފޫޓުގެ ބިމެއް މިހާރު ވަނީ ހަމަޖައްސާފައެވެ.

ޖުމްލަ 25 މިލިއަން ޑޮލަރުގެ މި މަޝްރޫއަކީ ދިވެހި ސަރުކާރާއި ޔޫރަޕިއަން އިންވެސްޓްމަންޓް ބޭންކް (އީއައިބީ) ގެ ލޯނު އެހީގެ ދަށުން ކުރިއަށްގެންދާ މަޝްރޫއެކެވެ.

މި މަޝްރޫއުގެ ފީސިބިލިޓީ ހެދުމުގެ މަސައްކަތް ޖަރުމަނުގެ ޖައިޓެކް ކޮންސަލްޓިން ގްރޫޕާ 1.2 މިލިއަން ޑޮލަރަށް ހަވާލުކޮށްފައިވާއިރު، އެ މަސައްކަތުގެ ބޮޑުބައެއް މިހާރު ވަނީ ނިމިފައެވެ.

ވަޒީރު ވިދާޅުވީ މިހާރު ކުރިއަށްދަނީ ޑިޒައިން ކުރުމުގެ މަސައްކަތް ކަމަށާއި، އަންނަ ޖޫން ނުވަތަ ޖުލައި މަހުގެ ތެރޭގައި އަމަލީ މަސައްކަތް ކޮންޓްރެކްޓް ކުރުމަށް އިއުލާން ކުރެވޭނެ ކަމަށެވެ. މި ލެބޯޓަރީ ގާއިމުކުރުމަށް ހަމަޖެހިފައިވަނީ ދެ އިމާރާތެއްގެ ގޮތުގައެވެ. އެއީ އެމްއެފްޑީއޭގެ އިދާރީ އަދި ޓެކްނިކަލް މަސައްކަތްތަކަށް ހާއްސަ 9 ފަންގިފިލާގެ އިމާރާތަކާއި، ލެބޯޓަރީގެ މަސައްކަތްތަކަށް ހާއްސަ 3 ފަންގިފިލާގެ އިމާރާތެކެވެ.

އާ ލެބޯޓަރީއާއެކު ވައިރޮލޮޖީ ރިސްކް ލެވެލް 2 އަދި 3 ގެ ވައިރަސްތައް ތަހުލީލު ކުރުމާއި، ބެކްޓީރިއާއާ ގުޅުންހުރި ފުޅާ ދާއިރާއެއްގެ ތަހުލީލުތައް ކުރެވޭނެ އިންތިޒާމު ހަމަޖެހިގެންދާނެއެވެ.

މީގެއިތުރުން، ކާބޯތަކެއްޗާއި ބޭސް ތަހުލީލު ކުރުމުގެ ހިދުމަތް ބައިނަލްއަގުވާމީ ފެންވަރަށް ތަރައްގީވެ، ރާއްޖެއަށް އެތެރެކުރާ އަދި ބޭރުކުރާ ތަކެތީގެ ރައްކާތެރިކަން ކަށަވަރުކުރުން ހަރުދަނާވާނެއެވެ. މި އިމާރާތުގައި ގައުމީ އިންފްލުއެންޒާ ސެންޓަރުގެ ހިދުމަތްވެސް ގާއިމުކުރެވޭނެ ކަމަށް ވަޒީރު ވިދާޅުވިއެވެ.