މިދުވަސްވަރު ހުޅަނގު އޭޝިއާގައި، ޚާއްޞަކޮށް އީރާނާ ގުޅޭގޮތުން އުފެދިފައިވާ މަސްރަޙު ނުތަނަވަސްވެފައި ވަނިކޮށް، އުތުރު ކޮރެއާގެ ލީޑަރު ކިމް ޖޮން އުން އެ ޤައުމުގެ އާ މަނަވަރަކުން "ސްޓްރެޓީޖިކް ކުރޫޒް މިސައިލް" ތަކެއް ޓެސްޓުކުރުމުގެ ޙަރަކާތްތައް ބައްލަވާލައްވައިފިއެވެ.

މި މިސައިލްތައް ފޮނުވާލާފައިވަނީ ޚިދުމަތަށް ނެރުމަށް ތައްޔާރުވަމުންދާ "ޗޯ ހްޔޮން" ކްލާސްގެ އާ ޑިސްޓްރޯޔަރަކުންނެވެ.

އުތުރު ކޮރެއާގެ ރަސްމީ މީޑިއާއިން ރިޕޯޓުކޮށްފައިވާ ގޮތުގައި، ކިމް ޖޮން އުން ވަނީ އެ މަނަވަރުގެ މަސައްކަތްތައް ކުރިއަށްދާ ގޮތް ބައްލަވާލައްވައި، ކަނޑުގެ ސަރަޙައްދު ދިފާޢުކުރުމުގައި އެ ޤައުމުގެ އަސްކަރީ ޤާބިލުކަން އިތުރުކުރުމަށް ބާރުއަޅުއްވާފައެވެ. މި ޓެސްޓުތަކަކީ އެ ޤައުމުގެ ކަނޑުގެ ސިފައިންގެ ބާރު ވަރުގަދަކުރުމަށް ކުރިއަށްގެންދާ މުހިންމު ފިޔަވަޅެއްގެ ގޮތުގައި ވަނީ ސިފަކޮށްފައެވެ.

މިސައިލް ޓެސްޓުކުރުމުގެ މި ޙަރަކާތްތައް ކުރިއަށް މިދަނީ ބައިނަލްއަޤްވާމީ މައިދާނުގައި، ޚާއްޞަކޮށް މެދުއިރުމަތީގައި ބޮޑެތި ކުރިމަތިލުންތަކެއް ހިނގަމުންދާ ދަނޑިވަޅެއްގައެވެ. އުތުރު ކޮރެއާއިން ބުނާގޮތުގައި، މިއީ އެ ޤައުމުގެ އިސްތިޤްލާލާއި ސިޔާދަތު ދިފާޢުކުރުމަށްޓަކައި ޒަމާނީ ހަތިޔާރު އުފެއްދުމަށް ކުރަމުންދާ މަސައްކަތުގެ ތެރެއިން ކުރިއަށްގެންދިޔަ ޙަރަކާތެކެވެ.