އެކްޓިން ކޮމިޝަނަރު އޮފް ޕޮލިސް ފަރުހާދު ފިކުރީގެ މައްޗަށް ސީރިއަސް ތުހުމަތުތަކެއް ކުރެވުނު ނަމަވެސް، އެކަންކަން އޭނާގެ މައްޗަށް ސާބިތުނުވާ ކަމަށް ހޯމް މިނިސްޓަރު އަލީ އިހުސާން މިއަދު އިއުލާނު ކުރައްވައިފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން މިނިސްޓަރު އިހުސާން ވިދާޅުވީ، ފަރުހާދުގެ މައްޗަށް ކުރެވޭ ތުހުމަތުތަކާ ގުޅޭގޮތުން ކަމާބެހޭ މުއައްސަސާތަކުން މައްސަލަ ބަލާފައިވާ ކަމަށެވެ. އަދި އެއްވެސް މުއައްސަސާއަކުން އޭނާއާ މެދު ފިޔަވަޅެއް އެޅުމަށް އަންގާފައިނުވާ ކަމަށާއި، އެ މައްސަލައަކީ އޭނާގެ މައްޗަށް ސާބިތުނުވާ މައްސަލައެއް ކަމަށް މިހާރު ކަނޑައަޅާފައިވާ ކަމަށްވެސް މިނިސްޓަރު ވިދާޅުވިއެވެ.

ފަރުހާދުގެ މައްޗަށް މި ތުހުމަތުތައް ފެންމަތިވެފައިވަނީ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ (241) ކޮމިޓީއަށް ފޮނުވި ސިޓީއަކާ ގުޅިގެންނެވެ. އެ ސިޓީގައި ތުހުމަތުކޮށްފައިވާ ގޮތުގައި، ފަރުހާދުގެ ފިރިހެން ދަރިފުޅު 18 އަހަރުން ދަށުގެ ކުއްޖަކު ރޭޕްކުރި ކަމަށް ބުނާ މައްސަލައިގެ ތަހުގީގަށް ހޯދާފައިވާ ހެކިތަކެއް، ފަރުހާދު އޭނާގެ މަގާމުގެ ނުފޫޒު ބޭނުންކޮށްގެން ވަނީ ނައްތާލާފައެވެ.

މި މައްސަލައަކީ އާންމުންގެ ބޮޑު ސަމާލުކަމެއް ލިބިފައިވާ މައްސަލައަކަށް ވީނަމަވެސް، ސަރުކާރުގެ ކަމާބެހޭ އިދާރާތަކުން ބެލި ބެލުމުން އެފަދަ ކަމެއް ހިނގާފައިވާކަން ސާބިތުކުރެވޭނެ ހެއްކެއް ނެތް ކަމަށް މިނިސްޓަރު ވަނީ ވިދާޅުވެފައެވެ.

"އެއިން އެއްވެސް މުއައްސަސާއަކުން ފަރުހާދުއާ ދޭތެރޭ އަޅަންޖެހޭ ފިޔަވަޅެއް ކަމަށް އަދި ތަނުން ވަކިކުރުމަށް، ނުވަތަ ޕްރޮމޯޝަން ހިފެހެއްޓުމަށް ކަނޑައަޅުއްވާފައެއް ނެތް. އެ މައްސަލަތައް ތަހުގީގުކޮށް ބެލި އެ މައްސަލަތަކަކީ ފަރުހާދުގެ މައްޗަށް ސާބިތުނުވާ މައްސަލަތަކެއް ކަމަށް ވަނީ ކަނޑައަޅާފައި." ވަޒީރު ވިދާޅުވި އެވެ.

ފަރުހާދު އެކްޓިން ސީޕީގެ މަޤާމަށް އައްޔަނު ކޮށްފައިވަނީ، ކޮމިޝަނަރ އޮފް ޕޮލިސްގެ މަގާމުގައި ހުންނެވި އިސްމާޢީލް ނަވީން، ފުލުހުންގެ ޚިދުމަތުން ޝަރަފުވެރިކަމާއެކު ރިޓަޔަރ ކުރެއްވުމާ ގުޅިގެންނެވެ.

މިނިސްޓަރ އަލީ އިޙްސާން މި ނިންމެވުން ނިންމަވާފައިވަނީ "ދިވެހި ފުލުހުންގެ ޚިދުމަތުގެ ޤާނޫނު"ގެ 58 ވަނަ މާއްދާގެ (ނ) ގައިވާ ގޮތުގެމަތިންނެވެ. އެގޮތުން 2026 ފެބްރުވަރީ 18 ވަނަ ދުވަހުން ފެށިގެން ފުލުހުންގެ މުއައްސަސާ ވަގުތީގޮތުން ހިންގަވަމުން ދަނީ ފަރުހާދު ފިކުރީއެވެ.