ވެލާނާ އިންޓަރނޭޝަނަލް އެއާޕޯޓުން ގިނަ އަދަދެއްގެ މަސްތުވާތަކެއްޗާއެކު ހައްޔަރުކުރި އިންޑިއާގެ ދެ މީހުންގެ ބަންދަށް ކޯޓުން ހަ ދުވަސް ޖަހައިފިއެވެ.

މި މައްސަލާގައި ފުލުހުން ހައްޔަރުކޮށްފައިވަނީ އިންޑިއާއަށް ނިސްބަތްވާ އުމުރުން 21 އަހަރުގެ ކަތިރިވިލް މަނިމަރަން އާއި 19 އަހަރުގެ ދަނޫޝްކާނދަން ގޯޕާލް އެވެ. މި ދެ މީހުން ހައްޔަރުކޮށްފައިވަނީ ރާއްޖެއަށް މަސްތުވާތަކެތި އެތެރެކުރަން އުޅޭކަމަށް ފާހަގަކުރެވިގެން، އެއާޕޯޓުގެ ކަސްޓަމްސް އޮފިސަރުން އެމީހުންގެ ލަގެޖު ބަލައި ފާސްކުރުމަށް ފަހުގައެވެ.

ފުލުހުން މައުލޫމާތު ދޭ ގޮތުގައި، މި ދެމީހުންގެ ލަގެޖު ބަލައި ފާސްކުރިއިރު، މަސްތުވާތަކެތި އަޅާފައި ހުރި ކަމަށް ޝައްކުކުރެވޭ ފުޅިތަކެއް ވަނީ ފެނިފައެވެ. އެ ފުޅިތަކުގައި ހުރި ތަކެތި ތަހުލީލު ކުރި އިރު، މަސްތުވާތަކެތީގެ ބާވަތެއް ކަމަށްވާ ހަޝިޝް އޮއިލްއަށް ވަނީ ޕޮޒިޓިވް ވެފައެވެ. ފުލުހުން ބުނި ގޮތުގައި އަތުލައިގަނެވުނު މި ތަކެތީގެ ވަގުތީ ބަރުދަނުގައި ޖުމްލަ 6.7 ކިލޯ ހުއްޓެވެ.

މި މައްސަލާގައި ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މިހާރު ވަނީ އެމީހުންގެ ބަންދަށް 6 ދުވަހުގެ މުއްދަތެއް ދީފައެވެ.

ފުލުހުން ބުނީ މަސްތުވާތަކެތި ރާއްޖެއަށް އެތެރެކުރަން އުޅުނު މި މައްސަލަ އެއިދާރާއިން ދަނީ އިތުރަށް ތަހުގީގު ކުރަމުން ކަމަށެވެ.