މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ ވެރިޔާގެ މަގާމަށް މުހައްމަދު އިޝާން އައްޔަނުކޮށްފިއެވެ.

އިޝާން މި މަގާމަށް އައްޔަނުކުރައްވާފައިވަނީ އެފްއައިޔޫގެ ވެރިޔާގެ މަގާމަށް ކުރިމަތިލުމަށް ހުޅުވާލި ފުރުސަތުގައި، ކުރިމަތިލީ ފަރާތްތަކުގެ ތެރެއިން އިންޓަވިއު މަރުހަލާގައި އެންމެ މަތިން މާކްސް ހޯދައިގެންނެވެ. އިޝާން މިހާތަނަށް ހުންނެވީ އެމްއެމްއޭގެ ހެޑް އޮފް ފައިނޭންސްގެ މަގާމުގައެވެ.

އެފްއައިޔޫގެ ވެރިޔާގެ މަގާމުގައި މީގެ ކުރިން ހުންނެވީ އިސްމާއިލް ސާޖިދު އެވެ. ނަމަވެސް، މިދިޔަ ޑިސެމްބަރު މަހުގެ ތެރޭގައި ސާޖިދުގެ މައްޗަށް ޖިންސީ ފުރައްސާރައިގެ ތުހުމަތުތަކެއް ކުރެވުމާ ގުޅިގެން އޭނާ ފުރަތަމަ ސަސްޕެންޑު ކުރުމަށްފަހު، ފަހުން ވަނީ މަގާމުން ވަކިކޮށްފައެވެ.

ސާޖިދު އެ މަގާމަށް އައްޔަނުކުރީ މިދިޔަ އަހަރުގެ އޮގަސްޓް މަހުގެ ފަހުކޮޅުގައެވެ. އޭނާ އެ މަގާމަށް އައްޔަނުކުރީ، އޭރު އެފްއައިޔޫގެ ވެރިއަކަށް ހުންނެވި އަބްދުﷲ އަޝްރަފް މަގާމުން ދުރުކުރުމަށްފަހުއެވެ. އަޝްރަފް މަގާމުން ވަކިކުރީ، ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕުގެ ސީނިއާ ޑެޕިއުޓީ ލީޑަރު، އިބްރާހީމް ޝުޖާއުއަށް ތުހުމަތުތަކެއް ކުރެވޭ ފައިނޭންޝިއަލް އިންޓެލިޖެންސް ރިޕޯޓެއް ލީކްވި މައްސަލައަކާ ގުޅިގެންނެވެ.

އެމްއެމްއޭގެ އެފްއައިޔޫ އަކީ ރާއްޖޭގައި މަނީ ލޯންޑަރިންނާއި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނީ ޒިންމާ އުފުލާ މުހިންމު އިދާރާއެވެ.