އީރާނުގެ ވެރިރަށް ތެހެރާންގެ ހުޅަނގު ދެކުނުގައި އޮންނަ ފަރަންދު އަވަށުގެ ދެ ސްކޫލަކަށް އެމެރިކާ އާއި އިސްރާއީލުން ދިން މިސައިލް ހަމަލާތަކެއް އަރާފައިވާ ކަމަށް އީރާނުގެ މީޑިއާތަކުން ރިޕޯޓްކޮށްފިއެވެ.

އީރާނުގެ ފާރްސް ނިއުސް އެޖެންސީން އާންމުކޮށްފައިވާ ފޮޓޯތަކުން ފެންނަ ގޮތުގައި، މި ހަމަލާގެ ސަބަބުން ކްލާސް ރޫމްތަކަށާއި އެ ސަރަހައްދުގެ ބައެއް އާންމު ގެތަކަށް ބޮޑެތި ގެއްލުންތަކެއް ވަނީ ލިބިފައެވެ.

މި ހަމަލާ ދީފައި މިވަނީ، މީގެ ހަ ދުވަސް ކުރިން އީރާނުގެ ދެކުނުގެ ސިޓީއެއް ކަމަށްވާ މިނާބްގައި ހުރި އަންހެން ކުދިންގެ ސްކޫލަކަށް ދިން ނުރައްކާތެރި ހަމަލާއެއްގައި 165 ކުދިންނާއި މުވައްޒަފުން މަރުވި ހާދިސާއަށް ފަހުގައެވެ.

އެ ހަމަލާއާ ގުޅިގެން އެމެރިކާ އާއި އިސްރާއީލުން ބުނެފައިވަނީ އެއީ ސްކޫލެއްކަން ނޭނގޭ ކަމަށާއި، އެއީ އަސްކަރީ މަރުކަޒެއް ކަމަށް ބެލެވޭތީ ދިން ހަމަލާއެއް ކަމަށެވެ. ނަމަވެސް އަލްޖަޒީރާއިން ކުރި ތަހުގީގަކުން ދައްކާ ގޮތުގައި އެ ސްކޫލަކީ އަސްކަރީ މަރުކަޒާ ވަކިން ހުންނަ ތަނެއްކަން ފާއިތުވި 10 އަހަރު ދުވަހުވެސް ސާފުކޮށް އެނގެން އޮތް ތަނެކެވެ.

އީރާނުގެ ޚާރިޖީ ވަޒީރު އައްބާސް އަރަގްޗީ މި ހަމަލާތައް ކުށްވެރިކުރައްވައި ވިދާޅުވީ، މިއީ އެއްވެސް ކުށެއް ނެތް މައުސޫމް ކުދިން މެރުން ކަމަށެވެ. ފަރަންދުގައި ހުރި ސްކޫލްތަކަށް މިއަދު ދިން ހަމަލާގެ ސަބަބުން ލިބުނު ގެއްލުންތަކުގެ ތަފްސީލު އަދިވެސް ދަނީ ސާފުވަމުންނެވެ. އީރާނާއި އެމެރިކާ އަދި އިސްރާއީލާ ދެމެދު އުފެދިފައިވާ މި ހަމަނުޖެހުންތަކުގެ ސަބަބުން މުޅި މެދުއިރުމަތީގެ މަސްރަހު ވަނީ ނުތަނަވަސްވެފައެވެ.