މެދުއިރުމަތީގައި ފެށުނު ނުރައްކާތެރި ހަމަލާބަދަލުކުރުންތަކުގައި، އީރާނާއި އިސްރާއީލުގެ އިތުރުން ސަރަހައްދީ އެތައް ގައުމަކަށް ބޮޑެތި ގެއްލުންތަކެއް ލިބި، މަރުވި މީހުންގެ އަދަދު ވަނީ ވަރަށް ބޮޑަށް އިތުރުވެފައެވެ.

އީރާނުގެ ތަސްނީމް ނިއުސް އެޖެންސީން ރިޕޯޓްކުރާ ގޮތުގައި، އެމެރިކާ އާއި އިސްރާއީލުން އީރާނަށް ދިން ހަމަލާތަކުގައި މިހާތަނަށް 1,230 މީހުން މަރުވެފައިވެއެވެ. މީގެ ތެރެއިން އެންމެ ހިތްދަތި ހާދިސާ ހިނގާފައިވަނީ އީރާނުގެ ދެކުނު އިރުމަތީ ސިޓީއެއް ކަމަށްވާ މިނާބްގައެވެ. އެ ސިޓީގެ އަންހެން ކުދިން ކިޔަވާ ޕްރައިމަރީ ސުކޫލަކަށް ދިން ހަމަލާއެއްގައި 180 އެއްހާ ކުޑަކުދިން މަރުވެފައިވާ ކަމަށް އީރާނުގެ ހެލްތު މިނިސްޓްރީން ވަނީ ކަށަވަރުކޮށްދީފައެވެ.

އަނެއްކޮޅުން، އީރާނުން އިސްރާއީލަށް ދިން ބެލިސްޓިކް މިސައިލް ހަމަލާތަކުގައި އިސްރާއީލުން 11 މީހުން މަރުވެ، އެތައް ސަތޭކަ ބަޔަކު ވަނީ ޒަހަމްވެފައެވެ.

އާދީއްތަ ދުވަހު އިސްރާއީލުގެ މެދުތެރޭގެ ބެއިތު ޝެމޭޝްއަށް އަމާޒުވި ހަމަލާއެއްގައި އެކަނިވެސް 9 މީހުން މަރުވެފައިވާއިރު، ތަލް އަވީވްގެ 40 އަށްވުރެ ގިނަ އިމާރާތަށް ވަނީ ބޮޑެތި ގެއްލުންތަކެއް ލިބިފައެވެ.

މި ހަމަލާތަކުގައި އެމެރިކާގެ އަސްކަރިއްޔާއަށްވެސް ވަނީ އަމާޒުވެފައެވެ. އީރާނުން ދިން ހަމަލާތަކުގައި އެމެރިކާގެ 6 ސިފައިން މަރުވެ، 18 މީހަކު ޒަހަމްވެފައިވާކަން އެމެރިކާ އަސްކަރިއްޔާއިން ވަނީ ހާމަކޮށްފައެވެ.

މި ހަމަަނުޖެހުންތަކުގެ އަސަރު އަވަށްޓެރި ގައުމުތަކަށްވެސް ވަނީ ފޯރާފައެވެ.

ބަހްރޭންގައި ހުންނަ އެމެރިކާގެ ފަސްވަނަ ފްލީޓްގެ ހެޑްކުއާޓަރަށް އީރާނުން ހަމަލާ ދީފައިވާއިރު، އެ ގައުމުގައި ހިނގި ހާދިސާއެއްގައި ބޭރު ގައުމެއްގެ މަސައްކަތްތެރިއަކު ވަނީ މަރުވެފައެވެ. ލުބުނާނުގައި އިސްރާއީލުން ދެމުންދާ ހަމަލާތަކުގައި 77 މީހުން މަރުވެ 500 އަށްވުރެ ގިނަ މީހުން ޒަހަމްވެފައިވާއިރު، ކުވައިތާއި ޔޫއޭއީ އަދި ގަތަރުގައި ހުރި އެމެރިކާގެ އަސްކަރީ މަރުކަޒުތަކަށްވެސް ވަނީ ހަމަލާތައް އަމާޒުވެފައެވެ.

ޔޫއޭއީން ލިބުނު ރިޕޯޓްތަކަށް ބަލާއިރު، އެ ގައުމުގައި ތިބި ބޭރު ގައުމުތަކުގެ ތިން މީހަކު ވަނީ މަރުވެފައެވެ. ސައުދީ އަރަބިއްޔާގެ ރިޔާޟް އަދި ތެޔޮ އުފައްދާ ސަރަހައްދުތަކަށްވެސް ހަމަލާތައް އަމާޒުވި ނަމަވެސް، އެ ގައުމުން އެއްވެސް މީހަކު މަރުވިކަމުގެ ރިޕޯޓެއް އަދި ލިބިފައެއް ނުވެއެވެ.

މި ބޮޑު ހަނގުރާމައިގެ ސަބަބުން މުޅި މެދުއިރުމަތި ވަނީ ބިރުވެރިކަމެއްގެ ތެރޭގައެވެ. އުރުދުންއިން ބުނި ގޮތުގައި އެ ގައުމުގެ ވައިގެ ސަރަހައްދަށް ވަން އީރާނުގެ 49 ޑްރޯން އާއި މިސައިލް ވަނީ ވައްޓާލާފައެވެ. އިރާގުގައި ހަރަކާތްތެރިވާ އީރާނަށް ތާއީދުކުރާ ހަނގުރާމަވެރި ޖަމާއަތްތަކަށް އަމާޒުކޮށް އިސްރާއީލާއި އެމެރިކާއިން ދިން ހަމަލާތަކުގައިވެސް ބަޔަކު މަރުވެފައިވާކަން ވަނީ ކަށަވަރުވެފައެވެ. މުޅި ސަރަހައްދުގައި މަސްރަހު ނުތަނަވަސްވެފައިވާއިރު، މަރުވާ މީހުންގެ އަދަދު އަދިވެސް އިތުރުވުމަކީ އެކަށީގެންވާ ކަމެކެވެ.