އިސްލާމީ އުންމަތުގެ ވެރިކަމާ ހަވާލުވެވަޑައިގަންނަވާ ބޭފުޅުން، އެމީހުންގެ ދަށުގައިވާ ރައްޔިތުންނަށް އޮޅުވާލައި، މަކަރާއި ޙީލަތް ހަދާ ހާލުގައި މަރުވެއްޖެ ނަމަ، އެފަދަ މީހަކަށް މާތްﷲ ސުވަރުގެ ޙަރާމްކުރައްވާނެ ކަމަށް ކީރިތި ރަސޫލާ ﷺ ޙަދީޘް ކުރައްވާފައިވެއެވެ.

މި މައުލޫމާތު ބަޔާންވެގެންވަނީ ސަޙީޙުލް ބުޚާރީގެ 7151 ވަނަ ޙަދީޘްގައެވެ. މިއީ ވެރިކަމުގެ މަސްއޫލިއްޔަތަކީ ކިހާވަރެއްގެ ނުރައްކާތެރި އަދި ބޮޑު އަމާނާތެއްކަން ހާމަކޮށްދޭ ވަރަށް ވަރުގަދަ އިންޒާރެކެވެ.

މި ޙަދީޘްގައި ބަޔާންކުރައްވާފައިވާ ގޮތުގައި، މުސްލިމް ރައްޔިތުންގެ ކަންކަން ބެލެހެއްޓުމުގެ ބާރު ލިބިފައިވާ ކޮންމެ ވެރިއަކުވެސް، އޭނާގެ ރައްޔިތުންނަށް އިޚްލާޞްތެރިވާންޖެހެއެވެ.

ނަމަވެސް، ރައްޔިތުންނަށް އޮޅުވާލައި، އަމާނާތަށް ޚިޔާނާތްތެރިވެ، އެކަންކަމުގެ މަތީގައި ދެމިހުއްޓާ މަރުވެއްޖެނަމަ، އެމީހަކަށް ސުވަރުގޭގެ ވަސްވެސް ނުލިބޭނެކަމުގެ ބިރުވެރިކަން އޮތްކަން އިލްމުވެރިން ފާހަގަކުރައްވައެވެ. މިއީ ހަމައެކަނި ގައުމެއްގެ އެންމެ އިސްވެރިޔާއަށް އޮތް އިންޒާރެއް ނޫނެވެ. އޭގެ ބަދަލުގައި، އެކި ފަންތީގެ މަސްއޫލިއްޔަތުތަކާ ހަވާލުވެގެން ތިބި ހުރިހާ ވެރިންނަށްވެސް އޮތް ފިލާވަޅެކެވެ.

މިފަދަ ހަދީޘްތަކުން އެނގިގެންދަނީ އިސްލާމްދީނުގައި ވެރިކަމަކީ ހަމައެކަނި ލިބޭ ޝަރަފެއް ނޫންކަމާއި، އެއީ އާޚިރަތް ދުވަހު އެކަމާ މެދު ސުވާލުކުރެވޭނެ ބޮޑު މަސްއޫލިއްޔަތެއް ކަމެވެ. ރައްޔިތުންގެ ޙައްޤުތަކަށް ރައްކާތެރިވެ، ތެދުވެރިކަމާއެކު ވެރިކަން ކުރުމަކީ ސުވަރުގެ ހޯދުމަށް އޮތް މަގެއް ކަމުގައިވިޔަސް، އޮޅުވާލުމާއި މަކަރު ހެދުމަކީ ﷲގެ ކޯފާއާއި ސުވަރުގެއިން މަޙްރޫމްވުމަށް އޮތް ސަބަބެކެވެ.