ދިވެހި މިއުޒިކީ ދާއިރާގައި ގިނަ ދުވަސްތަކެއް ވަންދެން ޚިދުމަތް ކުރައްވާފައިވާ މަޝްހޫރު ލަވަކިޔުންތެރިޔާ އިބްރާހިމް ރަޝީދު (ހާބުރި) ގެ ސިއްޙީ ހާލަތު ގޯސްވެ، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަރުވާދޭން ފަށައިފިއެވެ.

މަޢުލޫމާތު ލިބިފައިވާ ގޮތުގައި، އުމުރުން 79 އަހަރުގެ ރަޝީދުގެ ސިއްޙީ ހާލަތު ގޯސްވެގެން ހޮސްޕިޓަލަށް ގެންގޮސް ފަރުވާދޭން ފަށާފައިވަނީ ރޭގެ ވަގުތެއްގައެވެ. އޭނާ ބަލިވެ އުޅޭތާ ދުވަސްތަކެއް ވެފައިވާއިރު، މިފަހަރު ހޮސްޕިޓަލުގައި އެޑްމިޓްކޮށްގެން ފަރުވާދެނީ ފުއްޕާމޭގައި ފެންހެދުމުގެ ސަބަބުން ކަމަށް މަޢުލޫމާތު ލިބެއެވެ.

'ހާބުރި' ގެ ނަމުން ދިވެހީންގެ ތެރޭގައި ބޮޑު މަޤުބޫލުކަމެއް ހޯދާފައިވާ ރަޝީދަކީ ދިވެހި މިއުޒިކް އިންޑަސްޓްރީއަށް 50 އަހަރަށްވުރެ ގިނަ ދުވަހު ޚިދުމަތް ކޮށްދީފައިވާ ފަންނާނެކެވެ. އަމިއްލަ ވަކި ސްޓައިލެއްގައި ލަވަ ހުށަހަޅައިދޭ ރަޝީދަކީ އޭނާ ކިޔާފައިވާ ގިނަ ލަވަތަކުގެ ރާގާއި ޅެން ވެސް އަމިއްލައަށް ތައްޔާރުކޮށްފައިވާ ހުނަރުވެރިއެކެވެ.

މީގެ އިތުރުން، ރަޝީދަކީ ބޮޑުބެރު ޖެހުމުގައި ވެސް ފާހަގަކޮށްލެވޭ ފަންނާނެކެވެ. އޭނާ ވަނީ މީގެ ކުރިން އަމިއްލަ ލަވަ އަލްބަމްތަކެއް ވެސް ނެރެ، ދިވެހީންގެ ހިތްތަކާ ކުޅެލި އެތައް ރީތި ލަވަތަކެއް މިއުޒިކީ ދާއިރާއަށް ހަދިޔާ ކޮށްފައެވެ.

ރަޝީދުގެ ސިއްޙީ ހާލަތު ގޯސްވި ޚަބަރާއެކު، މިއުޒިކީ ދާއިރާގެ ގިނަ ފަންނާނުންނާއި އޭނާގެ ސަޕޯޓަރުން ދަނީ މީސްމީޑިއާގައި އޭނާއަށް އަވަސް ޝިފާއަކަށް އެދި ދުޢާ ކުރަމުންނެވެ.