އިޒްރޭލުގެ ތަލް އަވީވްގެ އަވަށެއް ކަމަށްވާ ބްނޭ ބްރަކްގެ ފެން ހޮޅިއަކަށް އީރާނުން ދިން ކްލަސްޓާ މިއުނީޝަން ހަމަލާއަކާ ގުޅިގެން އެ ސަރަހައްދުގައި ބޮޑުބައި ފެނުގެ އަޑިއަށް ގޮސްފިއެވެ.

އޭޕްރީލް 1 ވަނަ ދުވަހު އީރާނުން ދިން މި ބާރުގަދަ މިސައިލް ހަމަލާގައި ބޭނުންކޮށްފައިވަނީ ވައިގެ ތެރޭގައި ގޮވައި، ކުދި ބޮންތަކެއްގެ ގޮތުގައި ބެހިގެންދާ ޒާތުގެ ނުރައްކާތެރި ހަތިޔާރެކެވެ. މި ހަމަލާގައި ބްނޭ ބްރަކްގެ މައި ފެން ހޮޅިއަކަށް ބޮޑެތި ގެއްލުންތަކެއް ލިބި، މަގުތަކާއި އިމާރާތްތަކުގެ ތެރެއަށް ފެންބޮޑުވުމުގެ ސަބަބުން އެ އަވަށުގެ ދިރިއުޅުމަށް ވަނީ ބޮޑު ހުރަހެއް އެޅިފައެވެ.

އިޒްރޭލުގެ ކަމާބެހޭ ފަރާތްތަކުން ހާމަކުރި ގޮތުގައި، މި ހަމަލާގެ ސަބަބުން ބްނޭ ބްރަކް އަދި އޭގެ ވަށައިގެންވާ ސަރަހައްދުތަކުން ފެނުގެ ހިދުމަތް ވަނީ މެދުކެނޑިފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ފެން ހޮޅި ފަޅައިގެން ދިޔަ ސަރަހައްދުން ބާރުމިނުގައި ފެން އަރަމުންދާއިރު، އެތައް އުޅަނދެއް ފެނުގެ ތެރޭގައި ތާށިވެފައިވެއެވެ.

މީގެ އިތުރުން، އީރާނުން ފޮނުވާލި މި މިސައިލްތަކުގެ ސަބަބުން ބްނޭ ބްރަކްގެ ބައެއް އިމާރާތްތަކަށް ގެއްލުން ލިބި، ކުޑަކުދިން ހިމެނޭހެން 14 މީހަކަށް އެކި ވަރުގެ އަނިޔާ ލިބިފައިވާ ކަމަށް އިމަޖެންސީ ހިދުމަތްތަކުން ރިޕޯޓްކޮށްފައިވެއެވެ.

މި ހަމަލާއަކީ އީރާނާއި އިޒްރޭލާ ދެމެދު ހިނގަމުންދާ ހަނގުރާމަ ވަރުގަދަވެ، ދެ ފަރާތުގެ އިންފްރާސްޓްރަކްޗާތަކަށް އަމާޒުކޮށް ހަމަލާ ދެމުންދާ ދަނޑިވަޅެއްގައި ދީފައިވާ ހަމަލާއެކެވެ.

އިޒްރޭލުގެ ސިފައިން ބުނާ ގޮތުގައި އީރާނުން ދަނީ އާންމުން ދިރިއުޅޭ ސަރަހައްދުތަކަށް ކްލަސްޓާ ބޮން ބޭނުންކޮށްގެން ހަމަލާދެމުންނެވެ. މި ހަމަލާއާ ގުޅިގެން ފެންބޮޑުވެފައިވާ ސަރަހައްދުތަކުން ފެން ހިއްކުމަށާއި، ހަލާކުވެފައިވާ ފެން ހޮޅި މަރާމާތު ކުރުމުގެ މަސައްކަތް ކަމާބެހޭ ފަރާތްތަކުން މިހާރު ވަނީ ފަށާފައެވެ.