މިއަދު ކުރިއަށްދާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އަދި ރިފަރަންޑަމްގައި ވޯޓުލުމުގެ ވަގުތު ހަމަވާން ބައިގަޑިއިރަށް ވެފައިވާއިރު، ހަވީރު 4:00 ގެ ކުރިން ވޯޓުލާ ކިއުތަކަށް އަރައި ނިންމުމަށް އިލެކްޝަންސް ކޮމިޝަނުން އިލްތިމާސް ކޮށްފިއެވެ.

ދައުލަތުގެ މީޑިއާއަށް މައުލޫމާތު ދެއްވަމުން އިލެކްޝަންސް ކޮމިޝަނުގެ ރައީސް މުހައްމަދު ޒާހިދު ވިދާޅުވީ، ކުރީގެ އިންތިޚާބުތަކާ ޚިލާފަށް މިފަހަރު ވޯޓުލުމުގެ ވަގުތު އިތުރުކުރުމުގެ އެއްވެސް ވިސްނުމެއް ކޮމިޝަނުން ނުގެންގުޅޭ ކަމަށެވެ. "އަޅުގަނޑުގެ އިލްތިމާސަކީ 4 ގެ ކުރިން ކިއުއަށް އަރާވަޑައިގަތުމަށް،" ޒާހިދު ވިދާޅުވިއެވެ.

އޭނާ އިތުރަށް ވިދާޅުވީ، ކަނޑައެޅިފައިވާ ވަގުތު ހަމަވުމުގެ ކުރިން ކިއުއަށް އަރާ ފަރާތްތަކަށް ވޯޓުލުމުގެ ފުރުސަތު ކޮމިޝަނުން ފަހިކޮށްދޭނެއެވެ.

އިލެކްޝަންސް ކޮމިޝަނުން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު، މިއަދު މެންދުރުފަހު 14:00 އާ ހަމައަށް ޖުމްލަ 131،947 މީހުން ވަނީ ވޯޓުލާފައެވެ. މިއީ ވޯޓުލުމުގެ ހައްގު ލިބިފައިވާ އާބާދީގެ 44.75 އިންސައްތައެވެ. މިހާތަނަށް ވޯޓުލީ މީހުންގެ ތެރޭގައި ގިނައީ ފިރިހެނުންކަން ފާހަގަކުރެވެއެވެ. އެގޮތުން 68،772 ފިރިހެނުން ވޯޓުލާފައިވާއިރު، އަންހެނުންގެ ތެރެއިން ވޯޓު ލާފައިވަނީ 63،175 މީހުންނެވެ.

މި އިންތިޚާބަކީ ރާއްޖޭގެ އިދާރީ ދާއިރާތައް ހިންގުމަށް މުހިންމު އިންތިޚާބަކަށް ވާއިރު، ލޯކަލް ކައުންސިލްތަކަށް އިންތިޚާބުކުރަންޖެހޭ ގޮނޑިތަކަށް 1،368 ކެންޑިޑޭޓުން ވާދަކުރައްވައެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ގޮނޑިތަކަށް 1،593 ކެންޑިޑޭޓުން ވާދަކުރައްވައެވެ.

މި އިންތިޚާބުގައި ޖުމްލަ 294،876 މީހަކަށް ވޯޓުލުމުގެ ހައްގު ލިބިގެންވާކަމަށް އިލެކްޝަންސް ކޮމިޝަނުން ބުނެއެވެ. ވޯޓުލުން ބަންދުކުރުމަށްފަހު، ގުނުމުގެ މަސައްކަތް ކަނޑައެޅިފައިވާ އުސޫލުތަކުގެ މަތިން ކުރިއަށްދާނެ ކަމަށްވެސް އެ ކޮމިޝަނުން މަޢުލޫމާތު ދެއެވެ.

އިންތިޚާބުގެ ކަންކަން އަމާންކަމާއެކު ކުރިއަށްދާއިރު، ގިނަ އަދަދެއްގެ ބަޔަކު އަދިވެސް ކިއުތަކުގައި ތިބިކަން ކޮމިޝަނުން ފާހަގަކުރެއެވެ.