އެމެރިކާގެ ރައީސް ޑޮނަލްޑް ޓްރަމްޕާއި ޑިފެންސް ސެކްރެޓަރީ ޕީޓް ހެގްސެތް މަގާމުން ވަކިކުރުމަށް ނުވަތަ އިމްޕީޗް ކުރުމަށް އެމެރިކާގެ ގާނޫނު ހަދާ މަޖިލީހުގެ ޑިމޮކްރެޓިކް މެންބަރުން މަސައްކަތް ފަށައިފިއެވެ.

ރިޕޯޓުތައް ބުނާގޮތުން ޓްރަމްޕާއި ޑިފެންސް ސެކްރެޓަރީ މަގާމުން ވަކިކުރަން ގޮވާލީ ރައީސް ޓްރަމްޕް އީރާނާ ދެކޮޅަށް ހަނގުރާމަ އިއުލާނުކޮށް، ގާނޫނާ ހިލާފަށް އަމަލުކުރަމުންދާ ކަމަށް ބުނެއެވެ. މީގެ އިތުރުން، ގާތްގަނޑަކަށް 100 އެއްހާ މެންބަރުން ވަނީ ގާނޫނު އަސާސީގެ 25 ވަނަ އިސްލާހުގެ ދަށުން ޓްރަމްޕް މަގާމުގެ މަސްއޫލިއްޔަތު އަދާކުރުމަށް "ފިޓް" ނޫން ކަމަށް ކަނޑައަޅައި، އޭނާ މަގާމުން ވަކިކުރުމަށް ނައިބު ރައީސް ޖޭޑީ ވެންސް އަށާއި ކެބިނެޓަށް ގޮވާލާފައެވެ.

އެގޮތުން އެމެރިކާގެ ގާނޫނު ހަދާ މަޖިލީހުގެ ކަނެޓިކަޓް ދާއިރާގެ މެންބަރު ޖޯން ލާސަން ވަނީ ޓްރަމްޕާ ދެކޮޅަށް 13 މާއްދާއެއްގެ މައްޗަށް އެކުލެވޭ ތުހުމަތުތަކެއް ހުށަހަޅާފައެވެ. ލާސަން ތުހުމަތު ކުރާ ގޮތުގައި ޓްރަމްޕް ވަނީ ކޮންގްރެސްގެ އެއްވެސް ހުއްދައެއް ނެތި ހަނގުރާމައިގެ ބާރުތައް ބޭނުންކޮށް، އީރާނާއި ވެނެޒުއޭލާގައިވެސް ހަނގުރާމައިގެ ކުށްތައް ހިންގާފައެވެ.

މީގެ އިތުރުން، އީރާނުގެ އަންހެން ކުދިން ކިޔަވާ ސްކޫލަކަށް ބޮން އެޅުމާއި، އާންމުން ދިރިއުޅޭ ސަރަހައްދުތަކަށް ހަމަލާދިނުމުގެ ސަބަބުން ޑިފެންސް ސެކްރެޓަރީ ޕީޓް ހެގްސެތް ވެސް މަގާމުން ވަކިކުރަން ޖެހޭ ކަމަށް މެންބަރުން ވަނީ ބުނެފައެވެ.

ނަމަވެސް، ވައިޓް ހައުސްއިން ވަނީ މި މަސައްކަތްތަކަކީ އެއްވެސް އަސާސެއް ނެތް "ބަލިކަށި" އަދި "ހަމަޖެހޭ" ކަމެއް ނޫން ކަމަށް ބުނެ ވަރަށް ބޮޑަށް ފާޑުކިޔާފައެވެ. ވައިޓް ހައުސްގެ ތަރުޖަމާނު ވިދާޅުވީ ޑިމޮކްރެޓުންނަކީ ޓްރަމްޕް މަގާމާ ހަވާލުވުމުގެ ކުރިން ވެސް އޭނާ މަގާމުން ވަކިކުރުމުގެ ނިޔަތުގައި މަސައްކަތް ކުރަމުންދާ ބައެއް ކަމަށެވެ.

މިހާރު އެމެރިކާގެ ކޮންގްރެސްގެ އަޣުލަބިއްޔަތު އޮތީ ރިޕަބްލިކަން ޕާޓީއަށް ކަމުން، މި އިމްޕީޗްމަންޓް މައްސަލަ ކާމިޔާބުވުމުގެ ފުރުސަތު ވަރަށް ކުޑައެވެ. އެހެންނަމަވެސް، ރައީސް ޓްރަމްޕްގެ ނަފްސާނީ ހާލަތާ މެދު ސުވާލު އުފައްދައި، ގިނަ ބަޔަކު ދަނީ ބައިނަލްއަގުވާމީ މައިދާނުތަކުގައިވެސް ކަންބޮޑުވުން ފާޅުކުރަމުންނެވެ.