ކޮންމެ އަހަރަކުވެސް މަންމައިންގެ ދުވަހާ ގުޅުވައިގެން މައިންނަށް ޝުކުރު އަދާކޮށް، ހަދިޔާ ބަދަލުކުރުމަކީ އަޅުގަނޑުމެންގެ ތެރޭގައި ވަރަށް އާންމު ކަމެކެވެ. ނަމަވެސް، މައިންގެ ދިރިއުޅުމުގެ އެންމެ މުހިންމު އެއް ބައި އަދިވެސް އޮތީ ގިނަ ބަޔަކަށް ނުފެނިއެވެ. އެއީ ހަމައެކަނި ކާންބުއިމާއި، ފެންވެރުވުމާއި، ގޭތެރޭގެ އާދައިގެ މަސައްކަތްތަކެއް ނޫނެވެ. އޭގެ ފަހަތުގައިވާ "މެންޓަލް ލޯޑް" ނުވަތަ ނަފްސާނީ ގޮތުން އުފުލަންޖެހޭ ބޮޑު ބުރައެވެ.

ނަފްސާނީ ދާއިރާގެ މާހިރުން ސިފަކުރާ ގޮތުގައި "މެންޓަލް ލޯޑް" އަކީ ފެންނަން ނެތް ނަމަވެސް، ހުއްޓުމެއް ނެތި ކުރަންޖެހޭ ކަންކަމެވެ. މީގެ ތެރޭގައި ކަންކަން ރޭވުމާއި، ހަނދާން ބެހެއްޓުމާއި، އިންތިޒާމުކުރުމުގެ އިތުރުން އާއިލާގެ ބޭނުންތައް ދެނެގަނެ، އެކަންކަމަށް ދުރާލައި ތައްޔާރުވުން ހިމެނެއެވެ. މިއީ ހަމައެކަނި ގިނަ މަސައްކަތްތަކެއް އެއްފަހަރާ ކުރުމެއް ނޫނެވެ. މިއީ އާއިލާގެ މުޅި ނިޒާމު ހިންގުމަށްޓަކައި ސިކުނޑިން ކުރާ ނުހަނު ބުރަ މަސައްކަތެކެވެ.

ކުލިނިކަލް ސައިކޮލޮޖީގެ ނަޒަރުން ބަލާއިރު، މި ނުފެންނަ ބުރައިގެ ސަބަބުން މައިންގެ ސިކުނޑިއަށް އަރާމުލިބޭ ވަގުތު ވަރަށް މަދެވެ. ކިތަންމެ ވަރުބަލިވެގެން އޮށޯވެލައިގެން އޮންނަ އިރުވެސް، ދަރިފުޅުގެ ވެކްސިން ޖަހާ ދުވަހާއި، މާދަމާ ކައްކާނެ އެއްޗަކާއި، ދަރިފުޅުގެ އިހުސާސްތަކަށް އަތުވެދާނެ ބަދަލުތަކާ މެދު ސިކުނޑި ދަނީ ހުއްޓުމެއް ނެތް މަސައްކަތެއް ކުރަމުންނެވެ. މިގޮތަށް އަބަދު ސިކުނޑި ހޭލާ ހުރުމުގެ ސަބަބުން، ނިދި މަދުވުމާއި، ނަފްސާނީ ގޮތުން ވަރުބަލިވުން ފަދަ ކަންކަން ކުރިމަތިވެއެވެ.

މިޒަމާނުގައި މައިންނަށް ކުރިމަތިވާ ޕްރެޝަރު ކުރިއަށްވުރެ ބޮޑެވެ. މުޖުތަމައު ގަބޫލުކުރާ ގޮތުގައި މަންމައަކީ ހަށިގަނޑު ރީތިކޮށް ބަހައްޓާ، ވަޒީފާގައި ކާމިޔާބު، އަދި ދަރިންގެ ކަންކަމުގައި ފުރިހަމައަށް ބައިވެރިވާ މީހަކަށް ވާންޖެހެއެވެ. ސޯޝަލް މީޑިއާއިން ފެންނަ "ފުރިހަމަ" ދިރިއުޅުމުގެ ސަބަބުން، އެ ފެންވަރަށް ދިއުމަށް ކުރެވޭ މަސައްކަތުން މައިން އިތުރަށް ބުރަވެ، އަމިއްލަ ނަފްސަށް ހުސްކުރާނެ ވަގުތެއް ނުލިބެއެވެ.

ދިރާސާތަކުން ދައްކާ ގޮތުގައި، ގޭތެރޭގެ އަމަލީ މަސައްކަތްތައް ބެހިގެން ދިޔަ ނަމަވެސް، ކަންކަން ރޭވުމުގެ "އޯނަޝިޕް" ނުވަތަ ޒިންމާ އަދިވެސް އޮންނަނީ މައިންގެ ބޯމަތީގައެވެ. މިސާލަކަށް ބައްޕަ ފިހާރައަށް ގޮސް އެއްޗެހި ގަތް ނަމަވެސް، ގޭގައި ހުސްވެފައި ހުރީ ކޮން އެއްޗެއްތޯ ބަލައި، ލިސްޓު ތައްޔާރުކުރުމުގެ ބުރަ އުފުލަނީ މަންމައެވެ. މިއީ ބަދަލުވާންޖެހޭ ކަމެކެވެ. ކަންކަން ހިއްސާކުރުމުގެ މާނައަކީ ހަމައެކަނި އެހީތެރިވުމެއް ނޫނެވެ. އެއީ ކަންކަން ރޭވުމާއި އޭގެ ޒިންމާވެސް ހަމަހަމައަށް އުފުލުމެވެ.

މި ނަފްސާނީ ބުރައިން މިންޖުވުމަށްޓަކައި، ގޭތެރޭގެ ނުފެންނަ މަސައްކަތްތަކަކީ ވެސް އަގުހުރި މަސައްކަތްތަކެއްކަން އާއިލާއިން ގަބޫލުކުރަންޖެހެއެވެ. އަދި ޝެއަރޑް ކަލަންޑަރު ފަދަ ވަސީލަތްތައް ބޭނުންކޮށްގެން ސިކުނޑީގައި ހުންނަ މައުލޫމާތުތައް ލިޔެ ބަހާލުމަކީ މުހިންމު ކަމެކެވެ. މަންމައަކީ "ސުޕަރވުމަން" އަކަށް ވާން މަސައްކަތް ކުރުމުގެ ބަދަލުގައި، އެހީތެރިކަމަށް އެދުމަކީ ނުކުޅެދުންތެރިކަމެއް ނޫންކަން ގަބޫލުކުރަންޖެހެއެވެ.

މިއަހަރުގެ މައިންގެ ދުވަހު މަންމައަކަށް ދެވޭނެ އެންމެ އަގުބޮޑު ހަދިޔާއަކީ، އެ މަންމަ ހިމޭންކަމާއެކު އުފުލަމުންދާ މި ބޮޑު ނަފްސާނީ ބުރަ ދެނެގަނެ، އެ ޒިންމާތައް ހަމަހަމައަށް އުފުލުމުގައި ބައިވެރިވުމެވެ. މައިން ވަރުބަލިވަނީ ހަމައެކަނި ހަށިގަނޑުން ކުރާ މަސައްކަތަކުން ނޫނެވެ. އެއީ އެއްވެސް މީހަކަށް ނުފެންނަހާ ބޮޑު ބުރައެއް ސިކުނޑީގައި އުފުލަމުންދާތީއެވެ.