އިންޑިޔާ އަދި ޗައިނާގެ ބޯޑަރު ސަރަހައްދުގައި ހިނގާދިޔަ ހަމަނުޖެހުންތަކުގައި، އިންޑިއާގައި ހައްޔަރު ކުރެވިފައިވާ ޗައިނާގެ ސިފައިންގެ މީހާ ދޫކޮށްލައިފިއެވެ.

މިދިޔަ ޖޫން މަހުން ފެށިގެން ދެގައުމުގެ ބޯޑަރު ސަރަހައްދުގައި ކުރިއަށްދާ ހަމަނުޖެހުންތަކުގެ ތެރެއިން އިންޑިޔާއިން ޗައިނާގެ ސިފައިންގެ މީހަކު ހައްޔަރު ކޮށްފައިވަނީ ބޯޑަރު ހުރަސްކޮށް އިންޑިޔާގެ ސަރަހައްދަށް ވަނުމުން ކަމަށް އިންޑިޔާއިން ހާމަކޮށްފައިވެއެވެ.

ހައްޔަރު ކުރެވުނު ޗައިނާގެ ސިފައިންގެ މީހާ ހައްޔަރުކުރެވުނު އިރު ހާލުދެރަވުމުން، ސިއްހީ އެހީތެރިކަން ފޯރުކޮށްދެވިފައި ވާނެކަމަށް އިންޑިޔާގެ ބޯޑަރު ބަލަހައްޓާ ސިފައިންނާ ހަވާލާދީ އިންޑިޔާގެ ނޫސްތަކުގައި ހާމަކޮށްފައިވެއެވެ.

ޗައިނާގެ ސިފައިންގެ މީހާ އަނބުރާ ޗައިނާއާ ހަވާލުކުރީ، ދެގައުމުގެ ދެމެދު އެއްބަސްވެފައިވާ ބޯޑަރު ބެލެހެއްޓުމުގެ ޕްރޮޓޮކޯލް ތަކުގެ ދަށުން ކަމަށްވެސް އިންޑިޔާގެ ބޯޑަރު ބަލަހައްޓާ ސިފައިން ހާމަކޮށްފައިވެއެވެ. އަދި މީގެ އިތުރުން މިދިޔަ ސެޕްޓެމްބަރު މަހު، ބޯޑަރު ހުރަސް ކުރުމުން، ޗައިނާ އިން ހައްޔަރުކޮށްފައިވާ އިންޑިޔާގެ 5 މީހުންވެސް ވަނީ ދޫކޮށްލާފައެވެ. ނަމަވެސް މިއީ އިންޑިޔާގެ ސިފައިން ނޫން ކަމަށް ޗައިނާގެ ބޯޑަރު ބަލަހައްޓާ ސިފަައިން ހާމަކޮށްފައިވެއެވެ.

މިދިޔަ ޖޫން މަހުން ފެށިގެން ދެގައުމުގެ ބޯޑަރުގެ ސަރަހައްދުގައި ކުރިއަށްދާ ހަމަނުޖެހުންތަކުގައި މިހާތަނަށް، އިންޑިޔާގެ 20 ސިފައިން މަރުވެފައިވެއެވެ.

މިއީ މިދިޔަ 45 އަހަރު ތެރޭގައި ދެގައުމުގެ ބޯޑަރު ސަރަހައްދުގައި ހަމަނުޖެހުން ހިނގައި ހަމަލާތައް ބަދަލުކޮށްފައިވާ ފުރަތަމަ ފަހަރުވެސްމެއެވެ. 1996 ވަނަ އަހަރު ދެގައުމުގެ ބޯޑަރު ބެލެހެއްޓުމަށް ކުރެވިފައިވާ އެއްބަސްވުމުގައިވާ ގޮތުން، ދެގައުމުގެ ބޯޑަރު ސަރަހައްދުގައި ބަޑި އާއި ގޮވާތަކެތި ބޭނުންކުރުމަކީ މަނާކަމެކެވެ.